«Այս տարի ունեցել ենք խնդիրներ, հատկապես կարկտի հետ կապված` Արմավիրի տարածաշրջանում, ինչպես նաև ծիրանի բերքի լուրջ կորուստ: Ունեցանք տևական երաշտ»,- այս մասին այսօր հրավիրված մամուլի ասուլիսի ժամանակ ասաց Հայաստանի Ագրարագյուղացիական միավորման ղեկավար Հրաչ Բերբերյանը:
«Վերջերս պետական գործիչներից մեկը հայտարարեց` «Ուր ա՞ երաշտ», թող իր աշխատասենյակից դուրս գա և տեսնի, որ 30-35 օր անընդմեջ տեղումներ չենք ունենում, խոսքը չի գնում ոռոգելի հողերի մասին, այլ ընդհանրապես երաշտի մասին, որը կարող է լուրջ ազդել, օրինակ` կարտոֆիլի պալարի գոյացման վրա: Մարդիկ երաշտն ու ոռոգելի հողերը իրարից չեն տարբերում:
Կարող ենք տարին հաշվել միջակ տարի, գիտենք որ գյուղատնտեսությունը բաց երկնքի տակ արտադրություն է, և կարող ենք ունենալ կորուստներ: Ինչ վերաբերում է ծիրանի արտադրությանը, ապա անցած տարվա համեմատ ցուցանիշը բարձր է` հատկապես Արարատի տարածաշրջանում: Ընդհանուր` ՀՀ-ում եթե ունեինք 24-25 հազար տոննա ծիրան, ապա 20 հազար տոննան Արարատի տարածաշրջանից էր:
Ամռան ժամանակաշրջանում սպասում էինք բարձր բերք, սակայն անցյալ տարվա պատմությունը կրկնվեց և մենք ունեցանք հիվանդություններ: Կունենանք միջակ բերք, անորակ, որովհետև հիվանդությունները մասսայական են:
Հացահազգիներից` ասեմ, որ շատ կարևոր էր կառավարության կողմից բարձր տեսակի սերմերի ներկրման ծրագիրը: Ստացանք բարձր բերք` 4-6.5 տոննա/հա: Սակայն դա ընդհանուր բերքատվության վրա չէր կարող ազդել, քանի որ դա ընդհանուր ցանքերի 5%-ն էր, մնացածը ցանվել են հին սերմեր:
Պատահական չինովնիկներ հայտարարում են 3.2 տոննա/հա բերքատվության մասին, ի՞նչ է մենք Կանադայի՞ն ենք անցնում»,- նշեց Բերբերյանը:
