Աֆղանստանում իշխանության գլխին գտնվող «Թալիբան» շարժումը արգելել է կանանց այցելել երկրի հայտնի ազգային զբոսայգիներից մեկը՝ ավելացնելով կանանց նկատմամբ սահմանափակումները։ Այս մասին տեղեկանում է «The Guardian» պարբերականից։
Ըստ պարբերականի՝ տարեկան հազարավոր մարդիկ են այցելում «Բանդ Է Ամիր» ազգային զբոսայգի՝ հիանալով այնտեղ գտնվող լճերի գեղեցկությամբ և գեղատեսիլ բնությամբ։ Սակայն Աֆղանստանի բարոյականության և առաքինության նախարարը գանգատվել է, որ զբոսայգի այցելող կանայք չեն պահպանում հիջաբը կրելու կանոնները։
«Տեսարժան վայրեր այցելելը կանանց համար պարտադիր չէ», – ասել է նախարար Մոհամմադ Խալիդ Հանաֆին և անվտանգության ուժերին պատվիրել թույլ չտալ կանանց մուտքը զբոսայգի։
Իշխանության վերադառնալուց ի վեր «Թալիբան»-ը փակել է աղջիկների համար նախատեսված միջնակարգ դպրոցների մեծ մասը, արգելել է կանանց համալսարան ընդունվել, ինչպես նաև աշխատել ՄԱԿ-ի գրասենյակներում։ Կանանց առջև դռները փակել են նաև հասարակական վայրերի մեծ մասը, այդ թվում՝ բաղնիքները, մարզասրահները, զբոսայգիները, գեղեցկության սրահները։
