Թուրքական Akşam թերթի փոխանցմամբ՝ Թուրքիայի նախագահ Աբդուլլահ Գյուլը հայտարարել է, որ Իսրայելն անշնորհակալ է։ Ըստ նրա՝ նախորդ տարվա մայիսի վերջին գրանցված «Մավի Մարմարա»-ի միջադեպից հետո Իսրայելը 4 անգամ պատրաստ է եղել ներողություն խնդրել Թուրքիայից, սակայն վերջին պահին փոշմանել է.
«Չնայած մենք արեցինք մեզանից կախված ամեն ինչ, Իսրայելն անշնորհակալ գտնվեց։ Նա անգամ բեռ է դարձել իր դաշնակիցների համար։ Իսրայելը 4 անգամ եկավ մեզ մոտ՝ ներողություն խնդրելու, սակայն վերջին պահին փոշմանեց»։
Հիշեցնենք, որ Թուրքիայից Իսրայելի ներողություն խնդրելու և փոխհատուցում վճարելու վերաբերյալ տարբեր վարկածներ էին շրջանառության մեջ դրվել։ Տարբերակներից մեկի համաձայն՝ Իսրայելը պատրաստ էր 100,000 դոլար փոխհատուցում վճարել «Մավի Մարմարա»-ի միջադեպի ժամանակ զոհված թուրքերի հարազատներին, սակայն «ներողություն» բառի փոխարեն պետք է գործածեր «ցավակցանք» բառը։
Մեկ այլ տարբերակի համաձայն էլ՝ Իսրայելը, փոխհատուցում վճարելուց բացի, պատրաստ է եղել նաև ներողություն խնդրել, բայց ոչ թե Թուրքիայից, այլ՝ զոհված թուրքերի հարազատներից։
