Յուրաքանչյուր երկիր ունի հազարամյակի՝ իր համար նախատեսված նպատակները մոր և մանկան առողջության պահպանման ոլորտում:
Կան երկրներ, որ արդեն հասել են այդ նպատակների իրականացմանը, կան երկրներ, որ մոտենում են իրենց նպատակներին, և կան երկրներ, որոնց համար արդեն անհասանելի են այդ արդյունքները: «Հայաստանը 2004 թ., ցավոք, գնահատվել է որպես երկիր, որի համար հասանելի կլիներ մանկական մահերի իջեցումը, եթե պահպանվեին անկման տեմպերը: Մենք, փաստորեն, մի աստիճանով իջել ենք ներքև, ու գիտակցում ենք, որ մայրական ու մանկական մահացության տեմպերը իջեցնելը հասանելի դարձնելու հարցում շատ անելիքներ ունենք»,- ասում է առողջապահության նախարարության մոր և մանկան առողջության պահպանման վարչության պետ Կարինե Սարիբեկյանը:
Հաջողության հասնելու համար նախարարությունը որոշել է համագործակցել ոլորտում ակտիվ ՀԿ-ների հետ: Այսօր տեղի ունեցավ 44 այդպիսի ՀԿ-ների և նախարարության միջև «Մոր և մանկան առողջության հայկական դաշինք»-ի կնքումը:
Արարողության ժամանակ ՀԿ-ների ներկայացուցիչները հայտնեցին, որ այս հուշագրով ավելի հեշտ կլինի համագործակցությունը և նախարարության աշխատանքը վերահսկելը:
