Վերջին շրջանում ծիրանի արտահանման ու ներքին սպառման հետ կապված բազում խնդիրներ էին առաջացել, որի համար քաղաքացիներին հորդորում էին գնել տեղական ծիրանն ու այդպես օգնել գյուղացուն։ Ինչպես հայտնի է՝ խնդիրը ստացավ որոշակի լուծում, բայց Վերին Լարսի պրոբլեմատիկ լինելու պատճառով՝ առաջիկայում ևս հնարավոր է առաջանան խնդիրներ։ Նշենք, որ վերջին մի քանի օրում 4 400 տոննայի չափ ծիրան է արտահանվել։
«Առաջին լրատվական»-ն այս մասին խոսել է ՀՀ գյուղատնտեսության նախարարի տեղակալ Գառնիկ Պետրոսյանի հետ, որի նշմամբ՝ սովորաբար խնդիրներ լինում են Լարսի անցակետի պատճառով, որը եղել է ոչ միայն այս տարի, այլ նախորդ տարիներին ևս։ Այս տարի հաջողվեց առկա խնդիրները հարթել, Լարսում միայն մեկ օր խնդիր առաջացավ հեղեղումների պատճառով, որից հետո ճանապարհը բացվեց ու ամեն բան կարգավորվեց։
Այսպես, թե այնպես մեր բնակչությունը մրգերի մեջ նախապատվությունը տալիս է ծիրանին, որն օգտագործում են՝ թե՛ թարմ, թե՛ պահածոյեցված, թե՛ չորացրած վիճակում, այսինքն՝ անկախ ամեն ինչից բնակչությունը ծիրանի ակտիվ սպառողն է։ Գնային տատանումներ այս մասով չեն նկատվում, ամեն ուր գրեթե նույն գինն է։ «Սպառողականությունը բարձրացնելու մասով կարող եմ ասել, որ կախված է բնակչության ֆինանսական վիճակից, այն ընտանիքը, որը կարող է գնել մի քանի կիլոգարամ՝ այսպես, թե այնպես այդքանն է գնելու, իսկ այն ընտանիքը, որն իրեն ավելին կարող է թույլ տալ, բնականաբար, շատ կգնի»,- ասում է Պետրոսյանը։
Ասում է՝ արտերկրում սպառման խնդիր չունենք, նույնիսկ, երբ նախորդ տարի նման խնդիր առաջացավ՝ սփյուռքահայությունը դարձավ ծիրանի ակտիվ սպառող, քանի որ նրանք մեծ քանակով գնելու խնդիր չունեին, իսկ մեզ մոտ ոչ բոլորը կարող են իրենց թույլ տալ մեծ գնումներ, դրա համար կոչերը ծիրան գնելու մեր երկրում այդքան էլ արդյունավետ չեն։
«Մենք ունենք մթերքներ՝ ծիրանը, խնձորը, սալորը, կեռասը, կարտոֆիլն ու այլ բանջարեղեները, որոնք եթե չարտահանենք, ապա կունենք մի շարք խնդիրներ ներքին շուկայում։ Վերին Լասում էր խնդիրներ գրեթե միշտ առաջանում են ինչ-ինչ պատճառներով ու վերջին շրջանում էլ բեռնափոխադրումների գները կրկնակի աճել են, այլ խնդիրներ էլ կան, որոնք ազդում են ապանքի ինքնարժեքի վրա, որի հետևանքով մեր ապրանքները երբեմն դառնում են անմրցունակ ռուսական շուկայում։ Մեզ այլընտրնքային ճանապարհներ են պետք, նոր պայմանավովածություններ ու ամենակարևորը խնդիրները վաղօրոք լուծել, ոչ թե թողնել վերջին պահին»,- եզրափակում է իր խոսքը նախարարի տեղակալը։
