Հայաստանի սպառողների ասոցիացիայի նախագահ Արմեն Պողոսյանը, լրագրողների հետ հանդիպմանը, խոսելով քաղաքային տրանսպորտի խնդիրների մասին, հայտնեց. «Մենք երթևեկում ենք անմարդկային պայմաններում։ Այս խնդիրը ունի և՛ էկոլոգիական, և՛ նյութական, և՛ սոցիալական կողմեր։ Ամենապարզ օրինակը եթե բերենք՝ ընկճված, ծալապատկված երեխան վաղը ինչպե՞ս պետք է տեր կանգնի մեր երկրին, իսկ երթուղային միկրոավտոբուսներում հենց այդ վիճակում ենք մենք գտնվում»։
Ա. Պողոսյանը հայտնեց, որ իրենք իրենց առաջարկություններով բազմիցս դիմել են բոլոր ժամանակների իշխանություններին, բոլորն էլ խոստացել են, որ կանդրադառնանան խնդրին, բայց արդյունք այդպես էլ չի եղել։ Ա. Պողոսյանի խոսքով՝ հասարակական ճնշումը պիտի իր ազդեցությունն ունենա խնդրի կարգավորման հարցում, իսկ իրենց տվյալներով՝ քաղաքի ուղևորափոխադրամիջոցների 90 տոկոսը միկրոավտոբուսներ են, որոնք նախատեսված չեն քաղաքային ռեժիմով աշխատելու համար։
«Քաղաքային իշխանությունները և Հանրային խորհուրդը որոշում կայացրեցին, որ պետք է զարգացնել միջին և մեծ տարողությամբ ավտոբուսների քանակը, սակայն համոզված եմ, որ առյուծի բաժինը լինելու է միջին տարողությամբ ավտոբուսներինը, մինչդեռ մենք լիարժեք մարդ ենք և արժանի ենք երթևեկել քաղաքակիրթ աշխարհում ընդունված պայմաններում»,- հայտնեց Ա. Պողոսյանը՝ միաժամանակ նշելով, որ մարդկանց շրջանում կատարված հարցումների արդյունքում՝ 93 տոկոսը գերադասել է երթևեկել էլեկտրատրանսպորտով, մասնավորապես՝ տրոլեյբուսներով, որոնք, ըստ նրա, հոգեվարքի մեջ են այսօր։ Նրա պնդմամբ՝ Հայաստանում էլեկտրաէներգիայի պաշարները բավական շատ են, և միանգամայն հնարավոր է էլեկտրատրանսպորտի գործունեությունը։
Խոսելով քաղաքաշինության խնդիրների մասին՝ Արմեն Պողոսյանը ասաց, որ քաղաքաշինության հիմնական սկզբունքը՝ կառուցապատումը, մեր ճարտարապետները պատկերացնում են շենքը շենքի կողքին դնելը. «Կետային կառուցումը թշնամու մոտեցում է։ Մենք սպասողներ ենք, և այս հարցում միայն փոքր հաջողությունների ենք կարողանում հասնել»։
Նրա խոսքով՝ այն, որ քաղաքի տեսքը գունային և էսթետիկ առումով բավական լավացել է՝ նկատելի է, սակայն բավարարող արդյունք չէ։
