Այս տարվա ապրիլից գազի հնարավոր թանկացումը էական բեռ է դառնալու տնտեսվարողների, արտադրողների ու ջերմոցային տնտեսությունների համար։ Զուգահեռաբար, փետրվարից թանկացող էլեկտրաէներգիան ու արդեն թանկացած խմելու ջուրը ստիպել են տնտեսվարողներին վերանայել ծախսերը։ Թանկացումներից տուժում են հատկապես այն բիզնեսները, որոնց արտադրանքի ինքնարժեքում գազն ու էլեկտրաէներգիան էական տեսակարար կշիռ ունեն։ Տեղական արտադրության ապրանքների գնաճի նոր ալիքը չի բացառվում։
Այս առնչությամբ Արտահանողների միության նախագահ Րաֆֆի Մխչյանը «Առաջին լրատվական»-ի հետ զրույցում նշեց, որ դեռևս արտահանողները լռություն են պահպանում մինչև տեսնեն, թե ինչքան են թանկանալու գզն ու էլեկտրաէներգիան. «Այսօր արտահանողների վրա այնքան լրացուցիչ բեռ է ավելանում օրեցօր, որ ասելու չի: Թե ոնց կլինի, ես չեմ կարող ասել, տարբեր ոլորտներում տարբեր կլինի, գյուղատնտեսության համար տարբեր կլինի: Այսօր գյուղատնտեսության մեջ մեծ խնդիր կա, որ ազոտային պարարտանյութը թանկացել է և գոյություն չունի: Այնպես որ շատ դժվար է հիմա ասել, թե ինչ արդյունք կունենանք սակագների բարձրացումից հետո»,-ասաց Մխչյանը:
Նա հավելեց, որ արտադրությունները տարբեր են, ինքը կարող է խոսել իր արտադրության մասին. «Ես սուրճ եմ բովում գազով, եթե գազը թանկացավ, սուրճն էլ կթանկանա, քանի որ սուրճի ինքնարժեքի մեջ գազի ծախսը ներառված է: Բայց թե ի՞նչ աստիճանի թանկացման դա կբերի, ես այսօր չեմ կարող ասել»:
Դիտարկմանը, որ ջերմոցային տնտեսությունները, որոնք վերջին շրջանում լուրջ զարգացում են գրանցել, լուրջ խնդիրների առաջ կարող են կանգնել, Արտահանողների միության նախագահն ասաց. «Գազը միայն մեզ համար չի թանկանում, աշխարհով մեկ թանկացել է ահռելի ձևով: Դա գլոբալ խնդիր է: Նույն ջերմոցային տնտեսությունից օգտվողներն էլ տեսնելու են, որ ուրիշ երկրներում էլ նույն կերպ թանկացում է եղել: Այնպես չէ, որ միայն մեզ մոտ է գազը թանկանում: Իսկ կոնկրետացնելու համար, թե որ ոլորտի վրա ինչպես կանդրադառնա, ինչ թանկացումներ կլինեն, դեռ վաղ է դրա մասին խոսելը: Դեռ ոչ մեկը չգիտի, թե սակագների փոփոխությունն ինչ աստիճանի է ազդելու գների վրա: Պետք է հասկանալ, թե դա ինչքանով է ազդելու ինքնարժեքի գոյացման վրա: Ընդհանրապես, սակագները տարբեր սպառողների համար տարբեր են լինում, մինչև 10 հազար խմ օգտագործողի համար մի գին է, 10 հազարից ավելի օգտագործողի համար ուրիշ գին է: Հետևաբար ազդեցությունն էլ տարբեր կարող է լինել»:
