Հայաստանի արտգործնախարարության խոսնակը հայտնել է, որ Հայաստանի և Թուրքիայի հատուկ բանագնացների առաջին հանդիպումը տեղի կունենա հունվարի 14-ին Մոսկվայում: Այն, որ հանդիպումը տեղի կունենա Մոսկվայում, դեռևս օրեր առաջ հայտնել էր Թուրքիայի արտգործնախարար Չավուշօղլուն, սակայն պարզ չէր հանդիպման օրը: Այժմ հայտնի է արդեն, որ հանդիպումը կլինի հունվարի 14-ին: Սա հետաքրքիր հանգամանք է: Ինչպես նկատել էի օրերս հրապարակված անդրադարձում, որոշակի ինտրիգ էր, թե արդյո՞ք հայ-թուրքական հանդիպումը տեղի կունենա մինչև ամերիկա-ռուսական բանակցությունը, թե՞ դրանից հետո: Ամբողջ հարցն այն է, որ հայ-թուրքական հարաբերության գործընթացը անկասկած իր վրա կրելու է ամերիկա-ռուսական հարաբերության ազդեցությունը, այն քննարկումների ներգործությունը, որ վերջին շրջանում բավականին ինտենսիվ ծավալվում են Վաշինգտոնի և Մոսկվայի միջև և որոնց վերաբերյալ «խիստ» բանակցություն է սպասվում հունվարի 10-13-ը:
Հունվարի 10-ին Վաշինգտոնն ու Մոսկվան կբանակցեն փոխարտգործնախարարների պատվիրակությունների մակարդակում, հունվարի 2-ին նշանակված է ՆԱՏՕ-ՌԴ Խորհրդի նիստը, իսկ հունվարի 13-ին պլանավորված է ԵԱՀԿ համաժողով, որի շրջանակում ևս սպասվում է ամերիկա-ռուսական շփում: Այդպիսով, ստացվում է, որ Մոսկվայում հայ-թուրքական առաջին հանդիպումը տեղի է ունենալու այդ ամենից հետո, ինչը թերևս հաստատում է այն, որ գործընթացը իր վրա կրելու է ամերիկա-ռուսական հարաբերության ու քննարկումների ազդեցությունը: Հատկանշական է, որ օրերս տեղի էր ունեցել ԱՄՆ ու Թուրքիայի արտգործնախարարների հեռախոսազրույց, որի ընթացքում Բլինքենն ու Չավուշողլուն քննարկել են նաև հայ-թուրքական կարգավորման ուղղությամբ աշխատանքում Թուրքիայի հատուկ բանագնացի նշանակումը: Ինչպես հայտնի է, Անկարան բանագնաց է նշանակել Սերդար Քըլըչին, որը եղել է Նահանգներում Թուրքիայի դեսպան: Հայաստանի հատուկ բանագնացը ԱԺ փոխնախագահ Ռուբեն Ռուբինյանն է: Հունվարի 14-ին նրանք առաջին անգամ կհանդիպեն Մոսկվայում:
