ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ ԱՄՆ-ն՝ դեկտեմբերի 9-10-ը կայանալիք «Հանուն ժողովրդավարության գագաթնաժողովի» մասնակիցներին, ամերիկյան շահերը սպասարկելու «պատվավոր իրավունք» կտա։
Զախարովան ուշադրությունը հրավիրել է ԱՄՆ նախագահի ազգային անվտանգության հարցերով օգնական Ջեյք Սալիվանի հայտարարության վրա, ով ասել է, որ միջազգային հարաբերությունների համակարգը փոխակերպվում է, իսկ նրանց ներկայիս կառույցը՝ ՄԱԿ-ի գլխավորությամբ, որը ձևավորվել է Երկրորդ համաշխարհային պատերազմից հետո, աստիճանաբար դառնում է անցյալ․ «Հենց այն, ինչի մասին մենք խոսում ենք արդեն երեք տարի: Պետությունները ոչնչացնում են միջազգային իրավունքի և ՄԱԿ-ի կենտրոնական դերի վրա հիմնված միջազգային հարաբերությունների համակարգը, որպեսզի ստեղծեն իրենց հարմարավետության գոտին, որում պատրաստվում են միանձնյա գերիշխել։ Հենց դրա համար Միացյալ Նահանգները կկազմակերպի ամբոխի տեսարան՝ «ժողովրդավարությունների գագաթնաժողովի» տեսքով, որի մասնակիցները կօժտվեն ամերիկյան ռեժիմի շահերը սպասարկելու պատվավոր իրավունքով»,- գրել է Զախարովան։
«Ջեյք Սալիվանի հայտարարությունը կարելի է գնահատել տարբեր կերպ՝ «ցինիկից» մինչև «սառնարյուն»։ Մի բան կա, որ չի կարելի հերքել: Երկար տարիների ընթացքում առաջին անգամ իրերն իրենց անուններով են կոչվել»,- ամփոփել է նա։
Ավելի վաղ ՌԴ ԱԳ նախարար Սերգեյ Լավրովը հայտարարել էր, որ այս միջոցառման նպատակը «մարդկանց, երկրներին ժողովրդավարականի և ոչ ժողովրդավարականի բաժանելն է»։
Հիշեցնենք, որ Միացյալ Նահանգների իշխանությունները 110 նահանգների և երկրների են հրավիրել «Հանուն ժողովրդավարության» գագաթնաժողովին, որն անցկացվում է դեկտեմբերի 9-10-ը՝ տեսակոնֆերանսի միջոցով։ Այդ երկրների թվում են նաև Հայաստանը և Վրաստանը։ Հրավիրյալների ցուցակում չկան Ադրբեջանը, ինչպես նաև Ռուսաստանը, Թուրքիան, Եգիպտոսը և մի շարք այլ երկրներ։
Հայաստանի Եվրոպական կուսակցության նախագահ Տիգրան Խզմալյանի խոսքերով՝ Զախարովի հայտարարությունները պետք է դիտարկել երկու տեսանկյունից։ Առաջինը՝ խորքային և հետո նոր մակերերսային․«Խորքայինը հետևյալն է. Բայդենի հաղթանակից հետո պարզ դարձավ, որ աշխարհը կիսվելու է երկու անհավասար մասերի՝ ժողովրդավարության ու բռնապետության ճամբարները։Կարծում եմ, որ հենց այս գագաթաժողովի ընթացքում մենք տեսնում ենք, թե ինչպես է բոլորի համար ակնառու դառնում այդ իրողությունը։բՄեր երկրի համար ամենակարևորն այն է, որ Հայաստանն ընդգրկված է առաջին՝ ժողովրդավարության ճամբարի մեջ։ Իզուր չէ, որ Միացյալ Նահանգների կառավարությունն ընտրեց հենց այսպիսի անվանում՝ <<Հանուն ժողովրդավարության>> գագաթաժողով։ Այստեղ ամենակարևորը, ըստ էության, ցանկն է։ Ցանկ, որտեղ Հայաստանն ընդգրկված է, իսկ Ռուսաստանը, Ադրբեջանը և Թուրքիան՝ ոչ։ Սա ախտորոշում է , դատական վճիռ, ինչ-որ տեղ նաև քաղաքական մահապատժի հայտարարություն է մեր ոսոխների համար։Պատերազմից հետո սա ամենակարևորն է։ Մենք հասկանում ենք, որ Հայաստանը մնացել է թույլ, խոցելի, բայց ժողովրդավարական երկիր ու աշխարհը դա գնահատեց։ Դա արվել է շնորհիվ հայ ժողովրդի, որն ընտրությունների ժամանակ ատամները սեղմած մերժեց ռուսական նախագիծն ու ընտրեց վարկաբեկված, թույլ, խոցելի, խայտառակված, բայց այն քաղաքական համակարգը, որ հայ ժողովուրդը կարող է այնուամենայնիվ վերափոխել ու վերընտրել։ Մենք տեսանք, որ ինչպիսի թույլ, անհաջող, սխալական էլ լինի մեր պետական կառուցվածքը, այնուամենայնիվ մենք ի վիճակի ենք այն շտկել»,-«Առաջին լրատվական»-ի հետ զրույցում ասաց նա։
Խզմալյանը հիշեցնում է, որ մոտավորապես նույն վիճակն էր 21 տարի առաջ՝ 1999 թվականին, Հոկտեմբերի 27-ից առաջ․«Մենք շատ դժգոհ էինք ստեղծված իրավիճակից և կարծես բավականին խառնաշփոթ իրողություն էր, բայց միայն Հոկտեմբերի 27-ի սպանությունից հետո մենք հասկացանք, որ հայոց անկախ պետականությունը սպանվեց։ Հիմա ինչ էլ ասեն Զախարովան, Լավրովը, Պուտիննն ու Պեսկովը՝ իրենք կարող են ուղղակի անբովանդակ քմծիծաղով կամ հեգնանքով դրան վերաբերել, բայց իրենք մերժված են։ Ռուսաստանը, Թուրքիան ու Ադրբեջանը մերժված են և դա նրանց ամենամեծ պարտությունն է, հետևաբար դա մեր ամենամեծ հաղթանակն է։ Մենք դա դեռ չենք գիտակցել, բայց մեծ հաշվով, դա Հայաստանի ժողովրդի հսկայական հաղթանակն է, որից հետո կլինեն նոր հաղթանակներ, եթե մենք հասկանանք, թե ինչ է կատարվել այսօր այս ժամերին»։
Երկրորդ հանգամանքն, ըստ մեր զրուցակցի, պատկերային բնույթ է կրում․«Բավական է նայել Բայդենի խոսակցության այդ գագաթաժողովին, երբ ԱՄՆ նախագահը նստած է, ամբողջ պատի վրա շարված մոնիտորների վրա հարյուրավոր երկրների նախագահներ ու վարչապետներ են, այսինքն ամբողջ աշխարհն է խոսում նրա հետ․․ պետք է հիշել, որ մի քանի օր առաջ Պուտինը խոսում էր Բայդենի հետ միայնակ ու մեկուսացված։ Այդ պատկերն ամեն ինչ ասաց Ռուսաստանի այսօրվա մեկուսացման ու մերժված վիճակի մասին։ Այս պատկերը շատ կարևոր է, որովհետև կարելի է շատ երկար բացատրել մտքերը, խոսքերն ու բովանդակությունը, բայց բավական է նայել պատկերին ու տեսնել, թե որքան մենակ, թույլ ու դատապարտված է Ռուսաստանը և որքան հզոր է ժողովրդավարական ճամբարը, որի մեծ փառք Աստծո, Միացյալ Նահանգների հրավերով նաև Հայաստանի Հանրապետությունն է»,-եզրափակեց նա։
