ԱՄՆ արժեթղթերի և բորսաների հանձնաժողովը հանգամանորեն կստուգի վարկանիշների կազմման մոդելը, որը օգտագործում է Standard & Poor’s գործակալությունը: Հանձնաժողովի հետաքրքրությունը շարժել են պետական գանձարանի ներկայացուցիչների մեղադրանքները՝ Standard & Poor’s-ի նկատմամբ. հայտնում է Wall Street Journal-ը:
Ըստ РИА “Новости”-ի՝ հարցումն անցկացվել է SEC-ի աշխատակիցների կողմից, որի մասնագիտացումը վարկանիշային կազմակերպությունների գործունեության նկատմամբ հսկողությունն է: Աղբյուրներից մեկի խոսքերով՝ ստուգման նպատակն ԱՄՆ օրենսդրության հնարավոր խախտումների բացահայտումն է:
Հսկողությունը հրահրել են հաղորդումներն այն մասին, որ վարկանիշային կազմակերպությունը հաշվարկների մեջ սխալ է թույլ տվել: Հիշեցնենք, որ ԱՄՆ ֆինանսների նախարարությունում վարկանիշային գործակալությանը մեղադրել են պետական պարտքի սխալ հաշվարկի մեջ` 10 տարվա մեջ՝ 2 տրիլիոն դոլար:
ԱՄՆ վարկանիշի իջեցումից հետո պետական գանձարանի պաշտոնյաները իջեցումն անվանել են անարդար: Նրանց կարծիքով՝ հաշվարկը պարունակել է լուրջ թերություններ, որոնց պատճառով վարկանիշային կազմակերպությունը կարող էր հաշվի չառնել ԱՄՆ վարկային հնարավորություններն ամբողջությամբ:
Իր հերթին՝ Standard & Poor’s-ը շեշտում է, որ երկրների վարկանիշի հաշվարկման ժամանակ տարբերություններ կան, սակայն դրանք սխալ չեն:
Արժեթղթերի և բորսաների հանձնաժողովը նաև կստուգի տեղեկությունն այն մասին, որ Standard & Poor’s-ի որոշ աշխատակիցների նախապես հայտնի է եղել ԱՄՆ վարկանիշն իջեցնելու մասին որոշումը:
