«Այս փուլում Ադրբեջանի հետ խաղաղ պայմանագրի շուրջ բանակցություններ չեն ընթանում։ Ադրբեջանի իշխանությունները նախևառաջ պետք է կենտրոնանան երկու եռակողմ հայտարարությունների շրջանակներում արդեն իսկ ձեռք բերված պայմանավորվածությունների կատարման վրա: Եթե երբևէ նման բանակցություններ սկսվեն, ապա դրանք անպայմանորեն պետք է ներառեն Լեռնային Ղարաբաղի կարգավիճակի հարցը` Մինսկի խմբի համանախագահների կողմից արդեն իսկ ամրագրված սկզբունքների հիման վրա»,-այս մասին ՌԴ արտգործնախարար Սերգեյ Լավրովի հետ հանդիպման ժամանակ հայտարարել էր ՀՀ նորանշանակ արտգործնախարար Արարատ Միրզոյանը։
«Ազատ քաղաքացի» ՀԿ ղեկավար Հովսեփ Խուրշուդյանը «Առաջին լրատվական»-ի հետ զրույցում անդրադառնալով Միրզոյանի դիտարկմանը, նկատեց, որ շատ ճիշտ շեշտադրում է արել Միրզոյանը, դա ՀՀ ներկա իշխանության մոտեցումն է և պետք է պահպանել այդ դիրքորոշումը։
Ինչ վերաբերում է հանդիպման ժամանակ Սերգեյ Լավրովի շեշտադրումներին, թե այս փուլում խոսք չի գնում Մինսկի խմբի շրջանակներում բանակցային գործընթացի վերսկսման մասին, ապա Խուրշուդյանը նկատեց, որ ամեն ինչ մնում է իր տեղում։ Հայաստանի շահերն ու քաղաքականությունը համընկնում է Մինսկի խմբի երկու համանախագահող երկրների՝ Ֆրանսիայի ու ԱՄՆ-ի քաղաքականության հետ։ Իսկ Ռուսաստանի քաղաքականությունը համընկնում է Թուրքիայի ու Ադրբեջանի քաղաքականությանը․ «Ոչ մի բան չի փոխվել։ Բայց այս իրավիճակում ինչ-որ բան ակնկալելը կախված է Ֆրանսիայի ակտիվությունից, որովհետև Միացյալ Նահանգները տարածաշրջանում արևմուտքի առաջամարտիկ լինելու դերը ավելի շատ վերապահել է Ֆրանսիային։ Մակրոնն էլ այդ ուղղությամբ որոշ քայլեր անում է։ Գործընթացը հենց Ֆրանսիայի ակտիվությունից է կախված և նրանից, թե որքանով է Ռուսաստանի և Ադրբեջանի շահերը որոշ դրվագներում հակասելու իրար։ Այդ դրվագներից մեկը կարող է լինել Ադրբեջանի չկատարած խոստումները։ Դա կարող է հանգեցնել նրան, որ Ռուսաստանը սկսի որոշակիորեն հավասարակշռված մոտեցում ցուցաբերել, ոչ թե որդեգրել բացառապես ադրբեջանամետ դիրքորոշում»,-ասաց մեր զրուցակիցը։
Հիշեցնենք, որ արտգործնախարարների հանդիպման ժամանակ Լավրովն ասել էր, որ խոսքը չի գնում բանակցային գործընթացի վերսկսման մասին, խոսքը այն ամենը կատարելու մասին է, ինչն արդեն ստորագրվել է նոյեմբերի 9-ին ու հունվարի 11-ին։ «Եվ առաջին հերթին անհրաժեշտ է ապահովել հուսալի անվտանգություն և, իհարկե, սկսել վերականգնել վստահությունը։ Այստեղ կարևոր դեր է խաղում փոխվարչապետերի մակարդակով գործող եռակողմ հանձնաժողովը՝ տրանսպորտային ենթակառուցվածքների ապաշրջափձակման ու տնտեսական կապերի հարցով։ Դա կլինի շատ կարևոր միջոց, որը կողմերին հնարավորություն կտա ավելի կառուցողական վերաբերվել տեղի ունեցողին։ Եվ, իհարկե, անհրաժեշտ է լրջորեն փոխել երկու կողմից հնչող հռետորաբանությունը։ Դա պայմաններ կստեղծի վերջնական ու լիարժեք կարգավորման համար», ասել էր Լավրովը։
Խուրշուդյանը նկատում է, որ սա ևս մեկ ապացույց է այն բանի, որ Ռուսաստանը փորձում է կոնֆլիկտը միանձնյա լուծել, որը չի կարող համապատասխանել Մինսկի խմբի շրջանակներում առկա դիրքորոշումներին․ «Բայց փորձելով միայնակ ստանձնել խնդրի լուծման միջնորդական առաքելությունը, Ռուսաստանը որոշակի հակասության մեջ է մտնում Արևմուտք հետ առնվազն Արցախի հարցում և առաջիկայում արդեն կերևա, թե դա ինչ հետևանքներ կարող է առաջացնել»,-ասաց Հովսեփ Խուրշուդյանը՝ եզրափակելով, որ առհասարակ Լավրովի մոտեցումները հաշվի առնելով՝ այս հանդիպումը Հայաստանի համար ոչ բարենպաստ էր և հերթական անգամ Ռուսաստանը ապացուցեց, որ Հայաստանն իր հետ որևէ հույս կապել չի կարող և Հայաստանը պետք է կողմնորոշվի դեպի Արևմուտք։
