«Կառավարության ծրագիրը բավական լավ ծրագրային փաստաթուղթ է 5 տարվա համար։ Կառավարությունը հաշվի է առել նախորդ բոլոր քննադատությունները և բավականին լավ տեսքի է բերել ծրագիրը։ Կան թերություններ, բայց սա շատ լավ ծրագիր է։ Ցավոք ընդդիմությունը չի անդրադառնում այդ փաստաթղթին։ Փոխարենը մենք ականատես ենք լինում էժանագին շոուների»,-«Առաջին լրատվական»-ի հետ զրուցում անդրադառնալով կառավարության ծրագրին ու այս օրերին Ազգային ժողովում տեղի ունեցող քննարկումներին և ոչ միայն, ասաց տնտեսագետ, «Տնտեսական իրավունքի կենտրոն» ՀԿ նախագահ Մովսես Արիստակեսյանը։
«Ես անգամ դժվարանում եմ նրանց ընդդիմություն անվանել։ Նրանք թուրք-ադրբեջանա-ռուսական ահաբեկչական խումբ են, որը ներդրվել է Հայաստանի խորհրդարանում և իրականացնում է հիբրիդային պատերազմ Հայաստանի դեմ՝ կատարելով նախկին նախագահի՝ դեռ 1999 թվականի հոկտեմբերի 27-ին ավարտին չհասցված սպանդը։ Այս մարդկանց գործունեությունը գլխավորում է գեներալ- գնդապետը՝ ցույց տալով, թե ինչպես կարելի է շշով հարվածներ հասցնել ճիշտ խոսքին։ Ազգային ժողովում գործում է Ռոբերտ Քոչարյան- Սերժ Սարգսյան տանդեմի ոհմակը։ Ուրիշ ոչինչ»,-ասաց Արիստակեսյանը՝ ավելացնելով, որ բոլորովին չի արդարացնում նաև իշխանության շարքերում գտնվող մի շարք պատգամավորների գործողությունները, որովհետև նրանք տուրք են տալիս ու հակադարձում են այն սադրանքներին, որը տարածում է Սերժ Սարգսյանի նախկին օգնականը կամ նրա փողերով աշխատող լրատվամիջոցների նախկին ներկայացուցիչները՝ այդ թվում նաև Մարդու իրավունքների պաշտպանության հանձնաժողովի նախագահը, ով, ըստ Արիստակեսյանի, երկակի ստանդարտ է կիրառում՝ փնովելով իշխանության ներկայացուցիչների գործողությունները մարդու իրավունքների պաշտպանության պրիզմայի ներքո՝ չբարձրաձայնելով իր կուսակիցների՝ Աննա Մկրտչյանի, Սեյրան Օհանյանի և այլոց հակասահմանադրական գործունեությունը։
Արիստակեսյանը նկատեց, որ արդեն պարզ է, որ այս Ազգային ժողովն իրեն սպառել է և այլևս այս խորհրդարանից որևէ բովանդակային աշխատանք ակնկալել հնարավոր չէ. «Ես դեռ ընտրություններից հետո էի ասել, որ խորհրդարան են անցել սևերը և մոխրագույն դարձած սպիտակները, որոնք Ազգային ժողովում չեն կարող աշխատել։ Նրանք միայն կարող են գոռալ, գոչել, թե ով, երբ ինչքան է գողացել։ Նրանք կարող են հարվածել, կռիվ հրահրել։ Եվ մենք հիմա ականատես ենք լինում այդ շոուին։ Միակ բանը, որ ճիշտ ասեց մեղադրյալ Վահե Հակոբյանը, դա այն է, որ այս խորհրդարանը կարճ կյանք ունի»,-ասաց մեր զրուցակիցը։
Մեր հարցին, թե ներկայում ինչ իրավական հիմքեր կան, որոնք կարող են հանգեցնել Ազգային ժողովի արտահերթ ընտրությունների, Արիստակեսյանը պատասխանեց.«Դրա նախադրյալներից մեկը կառավարության ծրագրի չընդունելն է, բայց Սերժ Սարգսյանի ձեռամբ ստեղծված սահմանադրության ուժով կայուն մեծամասնություն ձեռք բերած քաղաքական իշխանությունը ձայների մեծամասնություն ունենալու պարագայում թույլ չեն տա, որ կառավարության ծրագիրը չընդունվի։ Այսինքն մի տարբերակ չեղարկվում է, բայց կա մեկ այլ տարբերակ ևս, որը Ազգային ժողովի շարունակական անգործությունն է։ Բայց կարծում եմ, որ դա էլ չի աշխատի։ Բայց ժողովուրդն իր ձայնը պետք է բարձրացնի, իր խոսքը պետք է ասի։ Այլ կարծիք չկա»։
Մեր հարցին՝ որտեղից երաշխիք, որ նոր արտահերթ ընտրությունների դեպքում ժողովուրդը նմանատիպ ընտրություն չի կատարի և մենք կրկին չենք ունենա որակյալ Ազգային ժողով, Արիստակեսյանը պատասխանեց.«Այո, Ազգային ժողովը ներկայացնում է ժողովրդի պատկերը, ժողովրդի տրամադրությունները։ Եթե այս ընտրության ժամանակ կարողացան Ազգային ժողով անցնել նախորդ 30 տարում պետությունը թալանած, այս աղետալի վիճակին հասցրած քաղաքական ուժերի ներկայացուցիչները՝ ի դեմս ՀՀԿ-ի, ՀՅԴ-ի ու նրանց սատարող այլ արբանյակների, ապա երաշխիք, այո, չկա։ Բայց կարծում եմ, որ այս օրերի միջադեպերը նրանց ընտրողներին որոշակի ազդակներ կփոխանցեն, որ իրենք սխալվել են իրենց ընտրության հարցում։
Ես այս հարցում մեղադրում եմ նաև իշխանությանը, որը չկարողացավ ժամանակին սահմանադրական փոփոխություններ իրականացնել, ժամանակին փոխել կուսակցությունների մասին օրենքը, որպեսզի կարողանայինք այլ կարծիք ներկայացնող ուժերի, բարեկիրթ քաղաքական ուժերի տեսնել խորհրդարանում։ Իսկ այդպիսի քաղաքական ուժեր կան, որոնք ազգանպաստ ծրագրեր ունեին, բայց չհաղթահարեցին խորհրդարան անցնելու շեմը»,-եզրափակեց Մովսես Արիստակեսյանը։
