Ադրբեջանական զինված ուժերը առ այսօր շարունակում են մնալ Հայաստանի Հանրապետության տարծքում, որոշ հատվածներում անգամ փորձում են առաջխաղացում ապահովել։ Ամենօրյա ռեժիմով միջադեպեր են գրանցվում հայ և ադրբեջանցի զինծառայողների միջև։ Նախօրեին մենք անգամ զոհ ունեցանք Գեղարքունիքի մարզի Վերին Շորժայի սահմանային հատվածում։ Ըստ ՀՀ ՊՆ-ի՝ հակառակորդի կողմից հայ դիրքապահների ուղղությամբ կրակահերթեր էր արձակվել, որից հետո սկսված փոխհրաձգության արդյունքում մահացու հրազենային վիրավորում էր ստացել պայմանագրային զինծառայող։
Նույն լարված իրավիճակն է նաև Սյունիքի հատվածում։
Սահմանային միջադեպեր, հակառակորդի կողմից առաջխաղացման դեպքեր չեն գրանցվել հանրապետության այլ սահմանային գոտիներում, սակայն անհանգստություն կա, օրինակ, Վայոց ձորի սահմանամերձ համայնքներում։ Վայոց ձորի խոշորացված Զառիթափ համայնքի ղեկավար Սիմոն Բաբայանը ևս մեզ հետ զրույցում ասաց, որ խուճապ չկա սահմանամերձ համայնքներում, բայց անհանգստութուն կա։ «Խուճապ չկա, բայց երբ հանդիպում եմ բնակիչների հետ պարզ է դառնում, որ անհանգստություն կա»,-ասաց համայնքապետը։
Մեր դիտարկմանը՝ այդ անհանգստությունը ինչով է պայմանավորված, հակառակորդի կողմից գործողություննե՞ր են ձեռնարկվում սահմանային այդ հատվածներում, Բաբայանը պատասխանեց. «Ոչ, սահմանին հանգիստ է, բայց լարվածությունը ամբողջ հանրապետությունում է, սահմաններում է լարված։ Դրանով էլ պայմանավորված լարվածություն և անհանգստություն կա նաև մեր սահամանամերձ համայնքներում։ Այլ բան չեմ կարող ասել»,-ասաց մեր զրուցակիցը։
Արարատի մարզպետ Ռազմիկ Թևոնյանը մեզ հետ զրույցում ասաց, որ Արարատի մարզի սահմանամերձ համայնքներում, այդ թվում Տիգրանաշենում ոչ մի խուճապ չկա, ոչ մի լարվածություն չկա, քանի որ մարդիկ շատ լավ հասկանում են, որ դրանք շշուկներ են, խոսակցությունների մակարդակի լուրեր են և իրենք իրենց բնականոն կյանքով ապրում են. «Ոչ մի տագնապ չկա, լրիվ նորմալ է, Տիգրանաշենում, Երասխում, Սևակավանում, Զանգակատնում լրիվ նորմալ է, ոչ մի լարվածություն չկա, մարդիկ առօրյայով ապրում են»,-ասաց մարզպետը։
Մեր հարցին՝ օրինակ Տիգրանաշենի բնակիչների հետ հանդիպե՞լ է, մարդիկ ինչ անհանգստություններ ունեն, Թևոնյանը պատասխանեց, որ ինքը Տիգրանաշենում տուն ունի, շաբաթը 4-5 օր այդտեղ է ապրում, 20 հեկտար խաղողի այգիներ ունի նույն Տիգրանաշենում. «Այսինքն ես ամենօրյա շփման մեջ եմ այդ մարդկանց հետ և կարող եմ ասել, որ ոչ մի լարվածություն, մտահոգություն չկա»,-ասաց մարզպետը։
Մեր հարցին՝ ճի՞շտ են այն տեղեկությունները, որ Երասխի հատվածում ռազմական ոստիկանությունը հսկում է ճանապարհը և երեկոյան ժամերին քաղաքացիներին հորդորում են մեքենան վարել առանց լուսարձակների, մարզպետը պատասխանեց. «Նման բան չկա, չի եղել և իմ կարծիքով առաջիկայում չի էլ կարող լինել։ Մենք պրոբլեմ չունենք։ Եթե հանկարծ փորձեն մեզ անհանգստացնել, մենք իրենց ավելի շատ կանհանգստացնենք»,-եզրափակեց մարզպետը։
Երասխ համայնքի ղեկավար Ռադիկ Օղիկյանը ևս մեզ հետ զրույցում ասաց, որ համայնքում ամեն ինչ հանգիստ է, խուճապ չկա, բայց հրաժարվեց այլ հարցերի պատասխանել։
