Իշխանունություն-ՀԱԿ երկխոսության աշխատանքային չորրորդ հանդիպումն այսօր տևեց շուրջ հինգ ժամ: Ինչպես հանդիպման ավարտից հետո լրագրողներին տեղեկացրեց ՀԱԿ համակարգող Լևոն Զուրաբյանը, այդ ողջ ընթացքում Կոնգրեսը ներկայացրել է 85 էջանոց մի փաստաթուղթ, որտեղ մանրամասն ներկայացված են այն բոլոր հիմնավորումները, որոնք ծանրակշիռ փաստարկ են Հայաստանում արտահերթ նախագահական և խորհրդարանական ընտրությունների անցկացման համար:
«Հայաստանի իշխանական համակարգը ձևավորվել է ժողովրդի կամքը ամբողջությամբ աղավաղող համատարած և լայնածավալ ընտրակեղծիքների և բռնությունների արդյունքում: Ժողովրդի կողմից չընտրված իշխանության բռնի պարտադրման ընթացքում չեն խորշել սեփական ժողովրդի և տասը անմեղ մարդկանց վրա կրակելուց: Ժողովրդի խաղաղ ցույցերը ճնշելու նպատակով ներքաղաքական խնդիրների մեջ են ներքաշել և օգտագործել Հայաստանի զինված ուժերը, ինչը Սահմանադրության կոպիտ խախտում է»,- ՀԱԿ-ի 85 էջանոց հիմնավորումներից մի քանիսը Լևոն Զուրաբյանը ներկայացրեց լրագրողներին:
Նա նաև նշեց, որ այդ հիմնավորումների մեջ են ներառված նաև այն հանգամանքը, որ այս իշխանությունը երկրի խորհրդարանը վերածել է լոբբիստական կոռուպցիոն կառույցի, որում ընդգրկված պատգամավորների ճնշող մեծամասնությունը Սահմանադրության խախտումով զուգահեռաբար զբաղվելով գործարարությամբ՝ ծառայեցնում են պետության օրենսդիր իշխանությունը սեփական հարստացման գործին. «Ի դեպ մենք 76 պատգամավորի ցուցակ ենք տվել իշխանական պատվիրակությանը՝ կոնկրետ նշելով, թե ինչ բիզնեսով են նրանք զբաղվում»:
Զուրաբյանը նշեց, որ այս հիմնավորումները հաշվի առնելով՝ սահմանադրական կարգի վերականգնումը և լեգիտիմ իշխանության հաստատումը հրատապ անհրաժեշտություն է, ինչին կարելի է հասնել արտահերթ նախագահական և խորհրդարանական ընտրությունների միջոցով:
Լևոն Զուրաբյանը նշեց, որ իրենց ամենայն ուշադրությամբ լսել են և պայմանավորվածություն կա, որ օրակարգային առաջին հարցի վերաբերյալ քննարկումները լինելու է հաջորդ ռաունդում. «Այն տեղի կունենա մեկ շաբաթ հետո, որովհետև իշխանական կոալիցիան ժամանակ խնդրեց պատասխանի և իրենց տեսակետները ներկայացնելու համար»:
