Ստեփանակերտցի, թալիշցի, հադրութցի կանայք շարունակում են Երևանում, Աբովյան փողոցում ժենգյալով հաց թխել ու վաճառել։ Վաճառքից ստացված հասույթն ուղղվում է Զինծառայողների ապահովագրության հիմնադրամին։ Կանայք ուզւոմ են վերադառնալ Արցախ, ցավոք, ոչ բոլորը կարող են։ Թալիշցի կինը 2016-ին էր կորցրել տունը, անցած տարի պետությունից բնակարան էր ստացել, բայց մեկ տարի հասցրեց ապրել։ Էլի անտուն է։ Երևանում հյուրանոցում է բնակվում։ Չգիտի կվերադառնա, թե ոչ։ Հադրութցի կինը ևս Հադրութի շրջանի իրենց գյուղից ոչինչ չի հասցրել վերցնել։ Գնացել են Ստեփանակերտ՝ մտածելով, որ 1-2 օրից ամեն ինչ կավարտվի ու հետ կգնան, բայց պատերազմը սպասվածից երկար տևեց. «Անասունները գոմում այդպես կապված մնացել են։ Երևի սատկել են։ Ասում էին գյուղից նեխածի հոտ է գալիս…չգիտեմ ինչ է լինելու։ Եթե տալու էին հողերը, ավելի լավ էր ժողվորդին բացատրեին, թե ինչ է սպասվում ու տային, ոչ թե այսպես»,-ասաց մեր զրուցակից կինը։
Արցախցի կանայք գոհ են Արցախում ռուս խաղաղապահների տեղակայման որոշումից։ Անգամ Խաչատուր Աբովյանին են ցիտում, թե օրհնվի այն սհաթը, որ ռուսը ոտք դրեց մեր հողին։ «Աստված տա ռուսը ձեռը դնի մեր վրա ու մեզ պահի»,-ասաց արցախցի կինը։
Առավել մանրամասն՝ տեսանյութում
