Թուրքիայի փոխնախագահ Ֆուաթ Օքթայի հայտարարությունն այն մասին, որ իրենք պատրաստ են զորք ուղարկել Ադրբեջան, եթե Բաքուն դիմի իրենց այդ հարցով, ՀՀ ԳԱԱ Արևելագիտության ինտիտուտի տնօրեն, թուրքագետ Ռուբեն Սաֆրաստյանը համարում է Ադրբեջանին՝ պայքարը շարունակելու վճռականություն հաղորդելու միջոց:
«Ադրբեջանը, փաստորեն, օգտագործում է իր վերջին ռեզերվները և շատ ուժեղ հարվածներ է ստանում ադրբեջանական բանակը, մանավանդ վերջին օրերի ընթացքում: Փաստորեն, դրանով փորձում են Ադրբեջանին վճռականություն հաղորդել, որ շարունակի պայքարը: Ես համոզված եմ, որ, եթե Թուրքիայի գործոնը չլիներ, Ադրբեջանը վաղուց կգնար զինադադարի ու կսկսեր բանակցությունները: Որ Թուրքիան պատրաստ է զորք ուղարկել, ես դա վաղուց էի կանխատեսել, որովհետև իմ համոզմամբ, եթե Թուրքիան չի ուզում, որ Ադրբեջանը վերջնական ջախջախվի, պետք է իր զինված ուժերն ուղարկի: Հիմա էլ կա մասնակցություն, բայց զորք ուղարկելը վերջին միջոցն է, որ Թուրքիան լրիվ ներգրավվի պատերազմի մեջ»,- նշեց Սաֆրաստյանը:
Թուրքագետի խոսքով՝ այդ դեպքում հարց կառաջանա, թե ինչպես Թուրքիայի քայլին կնայեն Ռուսաստանն ու ՆԱՏՕ-ի շրջանակներում Թուրքիայի դաշնակիցները:
«Ռուսաստանը կարող է ավելի կտրուկ գործողությունների դիմել, արդեն ստիպված լինելով օգտագործելով իր հնարավորությունները: Ես ենթադրում եմ, որ դա կարժանանա նաև ՆԱՏՕ-ի շրջանակում իր դաշնակիցների շատ բացասական վերաբերմունքին: Եթե Թուրքիան տեսնի, որ Ադրբեջանը պարտվում է, ապա այլ քայլ չի մնա: Մի՞թե նրանք թույլ կտան, որ Ադրբեջանը պարտվի, ես կարծում եմ, որ այս հայտարարությունը պետք է լուրջ ընդունենք»,- ասաց թուրքագետը:
Ռուբեն Սաֆրաստյանի կարծիքով՝ Թուրքիան Ադրբեջան զորք ուղարկելու քայլից կարող է հրաժարվել միայն այն դեպքում, եթե շատ ուժեղ ճնշում զգա Ռուսաստանի, ԱՄՆ-ի և ՆԱՏՕ-ում իր դաշնակիցների կողմից:
Սեպտեմբերի 27-ից Ադրբեջանը Թուրքիայի աջակցությամբ ռազմական գործողություններ էր սանձազերծել Արցախի դեմ՝ կիրառելով ողջ զինանոցը, թիրախավորելով անգամ քաղաքացիական բնակչությանը թե Արցախում, թե Հայաստանում: Առկա են հաստատված տեղեկություններ, որ Ադրբեջանի զինուժի կազմում հայկական կողմի դեմ մարտերի մեջ են նաև Սիրիայից Թուրքիայի միջոցով բերված վարձկաններ:
Ադրբեջանն անտեսել է անգամ հոկտեմբերի 10-ից Ռուսաստանի Դաշնության նախագահ Վլադիմիր Պուտինի նախաձեռնությամբ Հայաստանի, Ռուսաստանի և Ադրբեջանի արտաքին գործերի նախարարների ձեռք բերած համաձայնությունը՝ կրակի դադարեցման մասին և պայմանավորվածության ուժի մեջ մտնելուց րոպեներ անց կրակել Արցախի ուղղությամբ, ձեռնարկել հարձակումներ, հրթիռակոծել առաջնագիծն ու բնակավայրեր: Հոկտեմբերի 17-ին Հայաստանի Հանրապետությունը և Ադրբեջանի Հանրապետությունը որոշել էին հոկտեմբերի 18-ին, տեղական ժամանակով ժամը՝ 00:00-ից հաստատել մարդասիրական զինադադար: Որոշումը կայացվել էր՝ ի շարունակություն ԵԱՀԿ Մինսկի խմբի համանախագահ երկրները ներկայացնող Ֆրանսիական Հանրապետության, Ռուսաստանի Դաշնության և Ամերիկայի Միացյալ Նահանգների նախագահների հոկտեմբերի 1-ին արված հայտարարության, ԵԱՀԿ Մինսկի խմբի համանախագահների հոկտեմբերի 5-ի արված հայտարարության և համաձայն հոկտեմբերի 10-ին Մոսկվայում ընդունված համատեղ հայտարարության: Հումանիտար հրադադարի մասին պայմանավորվածության ուժի մեջ մտնելուց րոպեներ անց Ադրբեջանը դարձյալ կրակել Արցախի ուղղությամբ, ձեռնարկել հարձակումներ, հրետակոծել առաջնագիծը:
