Երևանի Ֆիրդուսի թաղամասի Հանրապետության և Տիգրան Մեծ փողոցների հարակից հուշարձանները պահպանվելու են իրենց տեղերում և վերաարժևորվելու են շենքերի բակային ճակատները։
Այս մասին «Ֆեյսբուք»-ի իր էջում գրել է ՀՀ փոխվարչապետ Տիգրան Ավինյանի գրասենյակի ղեկավար Սերժ Վարագ Սիսեռյանը
«Մենք հայտարարել էինք, որ կառուցապատողների հետ բանակցությունների արդյունքում մի շարք դրական փոփոխություններ էին մտցվել Ֆիրդուսի թաղամասի կառուցապատման նախագծում։ Հանրապետության և Տիգրան Մեծ փողոցներին հարակից հուշարձանները պահպանվելու են իրենց տեղերում և վերարժևորվելու են շենքերի բակային ճակատները: Այս հուշարձան-շենքերին հաջորդելու են 2-4 հարկանի շենքեր՝փայտե պատշգամբներով, ինչի արդյունքում տվյալ տարածքում ստեղծվելու է նոր, համահունչ զբոսաշրջային միջավայր: Տարածքը եզրագծվելու է 250մ հետիոտնային ճանապարհով, որից այնկողմ արդեն կլինեն նորակառույց շենքերը»,- նշել է Սիսեռյանը:
Գրառմանը կից նա հանրության դատին է հանձնել Ֆիրդուսի թաղամասի վերոնշյալ հատվածի եռաչափ մոդելի վերաբերյալ տեսանյութը։
Սիսեռյանն ուրախությամբ տեղեկացրել է, որ մոտ ապագայում Երևանի կենտրոնում կլինի գեղեցիկ ու հետաքրքրություն ներկայացնող միջավայր։
