Սահմանադրական դատարանի շուրջ ստեղծվել է տարօրինակ իրավիճակ. նախագահ Արմեն Սարգսյանը չստորագրեց օրենսդրական փաթեթները, իսկ թե ինչու, նախագահն այդ մասին հրապարակային պարզաբանումներ չի տվել: Տպավորություն է ստեղծվել, որ ՍԴ-ի շուրջ քաղաքական հանգուցալուծմանը զուգահեռ, իրավական առումով խնդիրը մնում է առկախված:
Թեմայի շուրջ «Առաջին լրատվական»-ը զրուցել է փաստաբան Տիգրան Եգորյանի և «Իրավաբանների հայկական ասոցիացիայի» նախագահ Կարեն Զադոյանի հետ:
Առանձնացնելով խնդիրները՝ փաստաբան Տիգրան Եգորյանը նշեց. «Հունիսի 22-ին Ազգային Ժողովի կողմից ընդունվեցին սահմանադրական փոփոխությունները, որոնք ուժի մեջ մտան հունիսի 26-ին: Այդ պահից սկսած՝ Սահմանադրության համար պատասխանատու մարմինները, այդ թվում նաև հանրապետության նախագահը, պարտավոր են կյանքի կոչել սահմանադրական փոփոխությունները: Այս պարտավորությունը չկատարելը առաջացնում է լիազորությունների թերացում… Ըստ էության՝ սահմանադրական փոփոխությունների փաթեթը նախագահի չստորագրելու միակ հետևանքը պաշտոնավարումը դադարած ՍԴ անդամներին կենսաթոշակներ շնորհելու հարցի լուծման հետաձգումն է»: Տիգրան Եգորյանը նաև ընդգծեց, որ ՍԴ թեկնածուների առաջադրման և ընտրության բոլոր ձգձգումները և հապաղումներն ի վնաս Սահմանադրությամբ հռչակված նպատակների են:
«Զարմանալի է, թե ինչու է ՀՀ նախագահը հրաժարվում իր լիազորություններն իրականացնելուց»,- ընդգծեց Կարեն Զադոյանը՝ հավելելով, որ նախագահն իր լիազորությունները ճշգրիտ և ժամանակին պետք է իրականացնի, քանի որ նրա չստորագրելը անորոշություն է թողնում»:
Մանրամասն՝ տեսանյութում:
