Ջրաբան-էկոլոգ, անկախ փորձագետ Քնարիկ Հովհաննիսյանը, «Առաջին լրատվականի» հետ զրույցում ներկայացնելով Հրազդանին, ինչպես նաև բնապահպանական համակարգին սպառնացող վտանգները, իր մտահոգությունը հայտնեց այն կապակցությամբ, որ Հրազդանում շահագործվելիք հանքը բաց է լինելու, և ըստ ամենայնի՝ կկառուցվեն նաև պոչամբարներ։ «Անձրևաջրերի հետ վտանգավոր տարրեր կարող են ներթափանցել խմելու ջրի ավազան»,- ասաց փորձագետը՝ նշելով, որ Երևանը կարող է դրա պատճառով կորցնել խմելու ջուրը։
«Հայաստանում պոչամբարների թիվը հասնում է 20-ի։ Կասկածներ ունեմ, որ դրանցում պարունակվում են Մենդելեևի աղյուսակի բոլոր տարրերը։ Բացառված չէ, որ Հրազդանում շահագործվելիք հանքում լինեն նաև ռադիոակտիվ նյութեր»,- ավելացրեց Ք. Հովհաննիսյանը՝ նշելով, որ հանքարդյունաբերության այդպիսի էքստենսիվ զարգացումը վտանգավոր է մեր փոքրիկ հանրապետության համար։
Նրա կարծիքով՝ այս տեմպերով առաջ գնալով կկորցնենք մեր անտառները, թփուտները, կվտանգենք ոչ միայն մակերևութային, այլև ստորգետնյա ջրերը, արոտավայրերը, գյուղատնտեսության համար պիտանի հողերը։ «Դրանով նպաստում ենք հողի էրոզիայի առաջացմանը, ապագայում կունենանք ջրի սակավություն, հողի սահքի երևույթներ»,- տագնապած ահազանգեց Ք.Հովհաննիսյանը:
