Ակնհայտ է, որ կորոնավիրուսի համաշխարհային պանդեմիայով պայմանավորված ամբողջ աշխարհում տնտեսական իրադրությունն իր լավագույն օրերը չէ, որ ապրում է. պարզ է, որ ՀՀ տնտեսությունը նույնպես տուժում է դրանից: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Արուսյակ Ջուլհակյանը:
Նրա խոսքով, պարզ է, որ Հայաստանն ունենալու է տնտեսական խնդիրներ, եթե ոչ տնտեսական ճգնաժամ. «Բնական է, որ յուրաքանչյուր պետություն, մասնավորապես Հայաստանը, պետք է ձգի իր գոտիները և արտակարգ ռեժիմում վարի իր բյուջեի կառավարումը: Նաև դրան է ուղղված եղել այն հանգամանքը, որ դեռևս որևէ որոշում չկայացված, պատգմավորների մեծ մասը մարտ ամսվա պարգևավճարները մի քանի շաբաթ առաջ ուղղել են կորոնավիրուսի դեմ պայքարի հիմնադրամին:
Արդեն նախորդ շաբաթ ԱԺ նախագահը հայտարարեց, որ ԱԺ-ի ամբողջ պարգևավճարի ֆոնդը, որ նախատեսված է եղել երկրորդ եռամսյակի համար, ինչպես նաև ներկայացուցչական ծախսերի, գործուղումների համար հատկացվող գումարները, 500 մլն դրամի չափով հետ է ուղարկվում պետական բյուջե՝ կորոնավիրուսով պայմանավորված ճգնաժամային հարցերը լուծելու համար»,-ասաց պատգամավորը:
Նա հավելեց, որ կառավարությունը նույնպես որոշում է կայացրել երկրորդ եռամսյակի համար բարձրաստիճան պաշտոնյաների շրջանում հրաժարվել պարգևավճարներից. «
Սա ճիշտ որոշում է և չեմ բացառում, որ երրորդ եռամսյակի համար այս մոտեցումը շարունակվի»:
