Հիսուսի նկարը հայտնվել է շատ անսովոր մի վայրում: Այս մասին է պնդում Դենվերից մի ընտանիք, որը հրաշքի ականատես է դարձել: Ջեյքոբ Սիմենսն ու նրա հարսնացուն՝ Ջենթրի Լի Սազերլենդը, պատմել են, որ Walmart խանութից գնել են մի քանի նկար: Մի քանի օր անց իրենց խոհանոցում գետնի վրա հայտնաբերել են այդ գնման ժամանակ տրված ՀԴՄ կտրոնը, որի հակառակ կողմում անսովոր փոփոխություններ են տեղի ունեցել: Այս մասին հաղորդում է Newsru.com կայքը՝ հղում կատարելով Fox31 հեռուստաալիքին:
Կտրոնի հակառակ կողմում ամուսինները նկատել են մուգ բծեր, որոնցից Հիսուս Քրիստոսի պատկերն է նշմարվել: Նրանք անմիջապես զանգել են խանութ, որտեղ նրանց ասել են, որ այդպիսի փոփոխություններ լինում են, երբ կտրոնի վրա ջերմային ազդեցություն է լինում: Սակայն ամուսինները նշում են, որ այդպիսի բան չի եղել, նրանք հավատում են հրաշքի:
«Սա Աստծո օրհնությունն է: Աստված ինքն է հայտնվել մեզ և բացել մեր աչքերը: Մենք զգում ենք, որ պետք է կիսենք այդ օրհնությունը մյուսների հետ»,- ասել է Լի Սազերլենդը Դենվերի հեռուստատեսությանը:
