Երեկ ՀՀ վարչապետ Նիկոլ Փաշինյանը «ՀՀ պետական սահմանի մասին» օրենքի 16-րդ հոդվածին հղում անելով, որը վերաբերում է վարակիչ հիվանդությունների տարածման սպառնալիքի դեպքում պետական սահմանով հաղորդակցության ժամանակավոր դադարեցմանը, հայտարարեց, որ կառավարությունն արտահերթ հեռակա որոշում կընդունի Իրանի հետ հաղորդակցությունը երկու շաբաթով դադարեցնելու մասին։ Հանձնաժողովի այսօրվա նիստից հետո որոշում ընդունվեց, որ Իրան-Հայաստան սահմանը երկու շաբաթով փակել։ Ավելի վաղ ժամանակավորապես դադարեցվել էր Չինաստանի հետ առանց վիզայի ռեժիմը։
Ձեր տեղեկություններով՝ այս պահին ինչպիսի՞ն է իրավիճակը Չինաստանում․ «Առաջին լրատվական»-ի հարցին «Չինաստան-Եվրասիա» քաղաքական և ռազմավարական հետազոտությունների խորհրդի ղեկավար Մհեր Սահակյանը պատասխանեց․ «Ներկայումս իրավիճակը Չինաստանում դեռևս մտահոգիչ է, այսինքն՝ թե՛ մահացությունների թիվն է աճում, թե՛ վարակի սփռման աշխարհագրությունն է մեծանում։ Իհարկե, Չինաստանը մեծ երկիր է, ունի հնարավորություններ, և իր ամբողջ ռեսուրսները կենտրոնացրել է այս վարակի դեմն առնելու համար։ Համենայնդեպս, սա կատարվում է, բայց, քանի որ դեռևս այս հիվանդության վակցինան չի գտնվել, կարելի է ասել, որ Չինաստանը փորձում է ժամանակ շահել։ Մենք տեսնում ենք, որ Չինաստանում անծուխ պատերազմ է գնում։
Պետք է նշեմ, որ հիվանդությունն ավելի շատ վտանգավոր է նորածինների համար, ինչպես նաև տարիքով մեծերի համար, որոնք ունեն նաև շնչառական խնդիրներ։ Երիտասարդներն ավելի շուտ են վերականգնվում։ Պետք է ասել, որ կան նաև բուժման դեպքեր, բայց այստեղ մի զգուշություն էլ պետք է կիրառել․ ասում են՝ բուժվել են, բայց չինացիները նրանց դեռ պահում են կարանտինի մեջ, որպեսզի հասկանան՝ այս հիվանդությունը կրկնվելու հիմք ունի՞, թե՞ չէ»։
Մանրամասները՝ տեսանյութում։
