«Առաջին լրատվական»-ի զրուցակիցն է պաշտպանության նախկին փոխնախարար, «Ազատամարտիկների դաշինքի» խորհրդի անդամ Գագիկ Մելքոնյանը։
– Պարոն Մելքոնյան, նախօրեին տեղի ունեցավ Սամվել Բաբայանի ղեկավարած «Միասնական հայրենիք» կուսակցության արտահերթ համագումարը, որին նաև Դուք էիք ներկա։ Ի՞նչ զարգացումներ են հնարավոր առաջիկայում, ինչպիսի՞ քարոզարշավ եք պատկերացնում։
– Արդեն տեսանելի է, որ կա միտում արդար ընտրություններ անցկացնելու համար։ Բայց իշխանությունները շատ հարցերով խոչընդոտ են հանդիսանում, օրինակ՝ մեկ տարուց ավելի է՝ դատավարություն է գնում, Սամվել Բաբայանի կարգավիճակը մինչ այժմ պարզ չէ։ Վաղը վերջին օրն են նշանակել, որոշումը կլինի, ու զարգացումներն ըստ այդմ կլինեն։ Պարզ կդառնա՝ արդյոք իշխանություններն ուզո՞ւմ են, որ ամեն ինչ արդար ընթանա, թե՞ ոչ։ Չնայած ընտրարշավն այժմ մեկնարկած չէ, բայց բոլորն էլ տանում են պայքար։ Ինձ թվում է՝ լավ կլինի, երեկ ժողովրդի հետ շփվելուց հասկացա, որ վախի մթնոլորտը բացակայում է, մարդիկ զգում են, որ միայն ու միայն արդար ընտրություններ են լինելու։
– Եթե պարոն Բաբայանը չկարողանա առաջադրվել , ինչպես հասկացանք հայտարարությունից՝ առաջադրված թեկնածուներից մեկին եք սատարելու։
– Այդպես է. Սամվել Բաբայանը, միևնույն է, չէր առաջադրվելու, դատական պրոցեսի մեջ է։ Քանի Արցախում այս իշխանություններն են, ինձ թվում է՝ դրական չի լինի դատական վճիռը։ Սամվել Բաբայանը ցանկանում է, որ մի քանի թեկնածուներ համախմբվեն մեկի շուրջը։ Իրենք իրենց պայմաններն են ուզում դնել՝ ով լինի նախագահ, ինչ-որ ձևով համագործակցի մյուսների հետ։
– Կա՞ նախընտրելի թեկնածու։
– Ինձ թվում է՝ մի 4-5 օրից պարզ կլինի, որովհետև բոլորի հետ բանակցություններ են գնում։
– Համագումարին ներկա էր նաև թեկնածուներից ԱԳ նախարար Մասիս Մայիլյանը, ու շատերի կարծիքով՝ հենց նրա վրա կանգ կառնի ընտրությունը։
– Նրանք բոլորին հրավիրել էին, ներկա էր մենակ Մայիլյանը։ Ինչքան գիտեմ՝ թեկնածուներից բոլորին հրավիրատոմս են ուղարկել։
– Որոշ տեղեկություններով՝ ուժային հատվածը սատարելու է Վիտալի Բալասանյանին, որն այս իշխանությունների հանդեպ ռադիկալ տրամադրվածություն ունի։ Ի՞նչ կարծիք ունեք այդ մասին։
– Ես Վիտալի Բալասանյանի մասին ոչ մի բան չեմ ուզում ասել, ինքն իրեն սպառել վերջացրել է։ Նախկին իշխանությունները նրա թևերի տակ ձմերուկ դրեցին, էս մարդն էլ սկսեց աջուձախ խոսել, հետո քցեցին իրեն։ Հիմա նախկին իշխանություններն ուրիշին են սատարում, այդ մարդն էլ մենակ մնաց՝ ինչպես միշտ։
Մեր նախկին իշխանությունները և Ղարաբաղի ներկայիս իշխանությունները քցեցին իրեն, հիմա ուրիշին են ընտրում՝ տեսնելով, որ նա շատ է վարկաբեկված։
– Իսկ հնարավո՞ր է նախկին իշխանությունները ռևանշի վերջին շանսերն օգտագործեն Արցախի ընտրությունների ժամանակ։
– Չեմ կարծում, Արցախում էլ է շատ բան փոխվել, ժողովուրդն առաջվանը չէ, գիտի՝ ինչ է անում, այլևս չեն կարող խաբել ժողովրդին։
