«Արտաքին քաղաքական համատեքստում հանրապետության նախագահի այցելությունները մերձավորարևելյան երկրներ ամբողջովին տեղավորվում են թավշյա հեղափոխությունից հետո քաղաքական էլիտայի կողմից որդեգրված պրոակտիվ արտաքին քաղաքական նախաձեռնությանը: Եվ, իհարկե, մերձավորարևելյան ուղղությունը ՀՀ-ի ավանդական արտաքին քաղաքական վեկտորներից մեկն է, որը պետք էր լցնել նոր՝ որակյալ բովանդակությամբ՝ հիմնված ավելի հեռուն գնացող տեսլականների վրա: Ուստի նախագահ Սարգսյանի այցելություններն այդ երկրներ պատահական չեն»,- անդրադառնալով Հայաստան-Մերձավոր Արևելք հարաբերություններում առկա վերջին զարգացումներին՝ «Առաջին լրատվական»-ի հետ զրույցում ասաց ՀՀ նախագահի օգնական Էդուարդ Աբրահամյանը:
Խոսելով մասնավորապես Հորդանանի թագավորի սպասվելիք պաշտոնական այցի մասին Հայաստան՝ մեր զրուցակիցն ասաց. «Գաղտնիք չէ, որ նախագահ Սարգսյանն ունի լայն կապեր և հնարավորություններ, ունի մեծ ճանաչում և ունի նաև խորը անձնական հարաբերություններ Հորդանանի թագավորի հետ: Անցյալ տարի ապրիլին նախագահը պաշտոնական այցով գտնվում էր Հորդանանում, որտեղ հանդիպեց թագավորի հետ, և ձևավորվել է երկու երկրների օրակարգ, և այսօր ըստ էության մենք հյուրընկալում ենք պատասխան այցը»:
Ներկայացնելով Հորդանանի հաջողությունները որպես փոքր երկիր՝ Էդուարդ Աբրահամյանը նշեց. «Հորդանանը այն ունիկալ երկրներից է, որը կարողանում է մեծ ազդեցություն և քաղաքական դերակատարություն ունենալ և՛ արաբական աշխարհում, և՛ արևմտյան այն հիմնական երկրներում, որոնք իրենց շահերն ունեն Մերձավոր Արևելքում: Եվ Հորդանանը Հայաստանի համար այն յուրահատուկ երկրներից է, որը կարող է նպաստել Հայաստանի նորովի ներգրավմանը մերձավորարևելյան քաղաքականության մեջ, մերձավորարևելյան ինտեգրացիոն գործընթացների մեջ»:
Հարցազրույցն ամբողջությամբ՝ տեսանյութում:
