Ազգային ժողովը փետրվարի 6-ին Սահմանադրության 213 հոդվածի փոփոխության առաջին ընթերցման օրակարգով արտահերթ նիստ էր հրավիրել։ ԱԺ «Իմ քայլը» խմբակցությունը առաջին ընթերցմամբ իր կողմից ներկայացրած նախագիծը չընդունեց՝ առաջարկելով այն դնել հանրաքվեի։
Մարդկանց մի խումբ պնդում է, որ այս նախագիծը հակասահմանադրական է և չի կարելի նման բան թույլ տալ, իսկ մյուս խումբը նշում է, որ նմանատիպ խնդիր չկա և այն, միանշանակ, պետք է ընդունվի։ Ինչպիսի՞ն են ձեր դիտարկումները՝ որպես փաստաբան․ «Առաջին լրատվական»-ի հարցին «Իրավունքի Եվրոպա միավորում» իրավապաշտպան հասարակական կազմակերպության ներկայացուցիչ, փաստաբան Տիգրան Եգորյանը պատասխանեց․ «Ոչ քննարկման դրված նախագիծը, ոչ էլ հանրաքվեի հարցը սահմանադրականության հետ կապված ոչ մի խնդիր չունեն։ Երկու գործընթացներն էլ կլինեին համապատասխան Սահմանադրությանը, երկու գործընթացներն էլ կլինեին Սահմանադրությամբ սահմանված կոնկրետ պետական մարմինների և իշխանության ճյուղերի լիազորությունների, իրենց իրավազորության իրագործման շրջանակներում՝ դրանց համահունչ։ Հաշվի առնելով տարբեր մեկնաբանություններ, այստեղ շատ կարևոր է՝ ասեմ, որ այն ավելի շատ խոր ու կոնտեքստային հարցեր է կարգավորում, քան ուղղակի հպանցիկ ու մակերեսային դիտարկումը»։
Իսկ «Իրավունքի Եվրոպա միավորում» իրավապաշտպան հասարակական կազմակերպության ներկայացուցիչ, փաստաբան Լուսինե Հակոբյանն ասաց․ «Ազգային ժողովը, միանշանակ, այս լիազորություններն ուներ։ Այստեղ մեկ այլ թեմա է շահարկվում։ Հարցն այն է, թե այն հակասահմանադրական է, որովհետև չի ներկայացվում Սահմանադրական դատարանին՝ գնահատական տալու համար, սակայն սրա վերաբերյալ կարելի է արձանագրել հետևյալը․ Սահմանադրության 168-րդ հոդվածը հստակ թվարկում է Սահմանադրական դատարանի լիազորությունները, որտեղ նշվում է, որ, այո, Սահմանադրական դատարանը հանրաքվեի դրվող Սահմանադրական փոփոխությունների նախագծերի վերաբերյալ պետք է տա եզրակացություն։ Միևնույն ժամանակ, Սահմանադրության 169-րդ հոդվածն ամրագրում է, թե որ հարցով որ սուբյեկտը կարող է դիմել Սահմանադրական դատարան։ Սակայն դրանից չի բխում, որ այդ դիմող սուբյեկտները, այդ թվում՝ Ազգային ժողովը, պարտադիր պետք է դիմեն Սահմանադրական դատարանին։ Գուցե սա էլի թերացում է, անորոշություն է, բաց է, դրա համար էլ մեկնաբանությունները տարբեր կարող են լինել»։
Մանրամասները՝ տեսանյութում։
