Ամերիկայի գավաթի խաղարկության քառորդ եզրափակիչ բոլոր հանդիպումներում անակնկալ արդյունքներ գրանցվեցին: Կիսաեզրափակիչ դուրս չեկան Բրազիլիան և Արգենտինան, Պերուն հաղթեց իրենից կարգով բարձր Կոլումբիային, վերջին խաղում էլ Չիլիի չափազանց գեղեցիկ ու ուժեղ խաղ ցուցադրող հավաքականը զիջեց Վենեսուելային:
Ամբողջ առաջին խաղակեսի ընթացքում չիլիացիները նման չէին իրենք իրենց. նրանց գրոհներում բացակայում էր սրությունը, ինչը միանշանակ ձեռնտու էր վենեսուելացիներին: Վերջիններս առանց դժվարության պաշտպանվում էին և հակագրոհելու առիթը բաց չէին թողնում: Ընդհանուր առմամբ անհետաքրքիր առաջին խաղակեսի 35-րդ րոպեին անսպասելի գոլ գրանցվեց: Վենեսուելացիները դաշտի կենտրոնում տուգանային հարվածի իրավունք ստացան, գնդակին մոտեցավ Արանգոն, ում ճշգրիտ փոխանցումից հետո Վիսկարրոնդոն բացեց խաղի հաշիվը:
Երկրորդ խաղակեսը կարմիրները շատ ակտիվ սկսեցին և առաջին 25 րոպեների ընթացքում գնդակը մի քանի անգամ պարզապես հրաշքով չհայտնվեց Վեգայի դարպասում: Այդուհանդերձ, 70-րդ րոպեին չիլիացիներին հաջողվեց հավասարեցնել հաշիվը, աչքի ընկավ մի քանի րոպե առաջ հորիզոնական դարպասաձողին հարվածած Սուասոն: Հաշիվը հավասարվելուց հետո խաղը հանգստացավ և երկու թիմերն էլ ավելի շատ ուշադրություն էին դարձնում պաշտպանությանը: Թվում էր՝ թիմերը պատրաստվում են լրացուցիչ ժամանակի, սակայն 80-րդ րոպեին հերթական ստանդարտից հետո ամեն ինչ փոխվեց: Արանգոն գնդակը կախեց չիլիացիների տուգանային հրապարակի կենտրոն, խաղի մեծ մասն անգործ մնացած Բրավոն ձեռքից բաց թողեց այն, իսկ վրա հասած Սիչերոն սառնասրտորեն օգտվեց դարպասապահի նվերից:
Չիլիացիները երկու անգամ կարող էին հավասարացնել հաշիվը, սակայն մի դեպքում եզրային մրցավարը սխալվեց՝ խաղից դուրս վիճակ արձանագրելով, մյուս դեպքում էլ նույն Սիչերոն այս խաղի ընթացքում երկրորդ անգամ գնդակը դուրս բերեց դատարկ դարպասից:
Չիլի-Վենեսուլա՝ 1:2, ինչը նշանակում է, որ Copa America-ն մնաց առանց ֆավորիտներիի: Նշենք, որ կիսաեզրափակիչում Վենեսուելան կմրցի Պարագվայի հետ:
