2019 թվականի հոկտեմբերի 15-ին «Լիդիան Ինթերնեյշնլ» ընկերությունը հայտարարություն տարածեց, որ իր գլխավոր պարտատերերի հետ ստորագրել է հերթական չորրորդ վերախմբագրված հետաձգման համաձայնագիրը։ Ըստ այդ համաձայնագրի՝ համաձայնության են եկել, որ ֆինանսական պարտավորությունների գծով վճարումներ անելու են մինչև 2019 թվականի դեկտեմբերի 20-ը։
Ի՞նչ փուլում են գտնվում Ամուլսարի գործընթացները՝ հաշվի առնելով վերջին իրադարձությունները․ «Առաջին լրատվական»-ի հարցին իրավաբան, բնապահպան Նազելի Վարդանյանը պատասխանեց․ «Վաղուց արդեն հայտնի է, որ այդ ընկերության ֆինանսական վիճակը լավ չէ։ Նրանց վերջին աուդիտի եզրակացությունը խոսում է նրա մասին, որ սնանկացման եզրին կանգնած կազմակերպություն է։ Այս տարվա վերջին հաշվետվությունից երևում է, որ արդեն 45 միլիոնի բացասական հաշվեկշիռ ունի։ Դա նշանակում է, որ լուրջ ֆինանսական խնդիրներ կան, և պարզ է, որ ունի տարբեր բանկերից վերցված պարտքեր, ու նրանք այդ գումարները հետ պահանջելու իրավունք ունեն։ Այս համաձայնագիրը կապված է հենց դրա հետ, ու նրանք արդեն վերջնաժամկետ են տվել։
Վերջին օրերին մեր երկրում տեղի ունեցող ակտիվությունը կապված է հենց այս համաձայնագրի վերջնաժամկետի հետ։ Նրանք ամեն մի պատրվակով մուտք են գործում տարածք, նկարում են ու հետո հայտարարում, որ իրենք արդեն ունեն թույլտվություն, և ամեն կերպ փորձում էին թարմացնել համաձայնագիրն ու երկարացնել իրենց պարտավորությունների վճարման ժամկետները։ Համենայնդեպս, ես կարծում եմ՝ բացի նրանից, որ այդ կազմակերպությունը հանքարդյունաբերության ոլորտում փորձ չունի, իսկ մեր օրենսդրությամբ նախատեսվում է հինգ տարվա փորձ, հիմա էլ ունի ֆինանսական խնդիրներ։ Կարծում եմ՝ բացի իրավական հարցերից, այս վիճակում տնտեսապես էլ, եթե թույլ տան այս կազմակերպությանն այնտեղ որևէ գործունեություն իրականացնի, ապա այն կազդի մեր տնտեսության վրա»։
Իրավաբանը նաև հավելել է, որ եթե մեր կառավարության կողմից թույլտվություն տրվի, ու թեկուզ մեկ օր նրանք այդտեղ աշխատանքներ անեն, ապա ձեռք կբերեն որոշակի իրավունքներ արբիտրաժով գումարներ պահանջելու։
Մանրամասները՝ տեսանյութում։
