ԱԺ պատգամավոր Արման Բաբաջանյանը դիմել է նախկիններին մերժող, հեղափոխական օրակարգը պաշտպանող ոչ իշխանական ուժերին ու գործիչներին հավաք անցկացնելու նախաձեռնությամբ՝ նոր գաղափարներով, ծրագրերով և ռազմավարություններով հեղափոխությունը պաշտպանելու և հեղափոխության ընթացքը ավելի արդյունավետ դարձնելու նպատակադրումով. այն չի հետապնդելու կուսակցական կամ հատվածային շահ: Թեմայի շուրջ զրուցելու համար «Առաջին լրատվական»-ը հյուրընկալել է քաղաքագետներ Ստեփան Սաֆարյանին և Վիգեն Խաչատրյանին:
Ստեփան Սաֆարյանը այս նախաձեռնությունն անհրաժեշտ է համարում մի քանի պատճառներով. «Նախ՝ հեղափոխությունը պետք է իսկապես ոչ միայն անշրջելի դարձվի (իսկ ինչպես տեսնում ենք՝ այն հետ շրջելու մեծ ցանկություն ունեն նախկին իշխանությունները), այլև այն պետք է առաջ շարժվի: Եթե այսօր դժգոհություն կա հեղափոխության թիմից, դա այն է, որ հեղափոխությունը ամեն տեղ չէ, որ մտել է. բազմաթիվ մարզեր, բազմաթիվ համակարգեր դեռևս գործում են հին տրամաբանության շրջանակներում»:
Քաղաքագետի խոսքով՝ առաջարկությունը ճիշտ ժամանակին է. «Ես վստահ եմ, որ նպատակը շատ ազնիվ է՝ ի տարբերություն շատ այլ հավաքների, որ վերջին շրջանում տեղի ունեցան: Դրանց այլ անուն դրեցին, հետո այլ պահանջներով հանդես եկան՝ բացելով իրենց դեմքը»:
Ստեփան Սաֆարյանն ընդգծեց՝ այս դեպքում, սակայն, ամեն ինչ շիտակ է, և կապ չունի՝ ով ում հետ ինչ հարցերում տարաձայնություններ ունի. «Նպատակը մեկն է՝ հեղափոխությունը ամրապնդել և հասցնել բոլոր տեղերն ու մարդկանց սրտերը և այն դարձնել այնպիսին, որ յուրաքանչյուրը զգա հեղափոխության բարեբեր ազդեցությունը իր անձի վրա»:
Քաղաքագետ Վիգեն Խաչատրյանը ևս կարծում է, որ այս նախաձեռնության պահանջը վաղուց կար. «Իսկ «Վերնատունը» պետք է շրջանցել, դրան կհակակշռի հասարակությունը, ոչ թե այս հարթակը: «Վերնատան» թեման փակված է՝ պարզ է, թե այդ մարդիկ ինչ են ուզում. ժամանակները փոխվում են, իսկ այդ մարդիկ՝ ոչ, նրանք ուզում են պատմության անիվը հետ պտտել, որովհետև հավանաբար այնտեղ նրանք իրենց լավ էին զգում, իսկ այստեղ՝ անպիտան. դա իրենց պրոբլեմն է, կարող էին այստեղ էլ պիտանի մնալ»:
Մեր զրուցակիցը կարևոր է համարում հեղափոխական օրակարգը պաշտպանող ոչ իշխանական ուժերի ու գործիչների հավաք անցկացնելու գաղափարը. «Կարևոր է լայն ճակատով մասնակցել, ինչը չի նշանակում համագործակցել. կարելի է մասնակցել՝ հակադրվելով, կարելի է մասնակցել՝ քննադատելով, կարելի է մասնակցել՝ նոր առաջարկներ բերելով, բայց ոչ երբեք՝ լարելով իրավիճակը, անցնելով բարեկրթության բոլոր սահմանները»:
Վիգեն Խաչատրյանի համոզմամբ՝ կան բազմաթիվ լուրջ, կարող ուժեր, որոնք այս կամ այն պատճառով պրոցեսից դուրս են մնում. «Դա անթույլատրելի է»:
Հարցազրույցն ամբողջությամբ՝ տեսանյութում:
