Ադրբեջանական APA լրատվական գործակալությանը տված հարցազրույցի ժամանակ Ադրբեջանում Ֆրանսիայի դեսպան Գաբրիել Կեպլերն անդրադարձել է ղարաբաղյան հակամարտության կարգավորմանը.
«Բնականաբար, մենք հիասթափված ենք նրանից, որ Կազանի հանդիպումը չտվեց այն արդյունքները, որոնք ակնկալվում էին։ Սակայն մասնակիցների կարծիքով՝ որոշակի առաջընթաց գրանցվել է այդ հանդիպման ժամանակ։ Անկասկած կարելի է ասել, որ բաժակը կիսով չափ լի է, կիսով չափ դատարկ։
Սակայն կարևորն այն է, որ բոլորը կարծում են, որ բանակցությունները պետք է շարունակվեն, և որ միայն բանակցությունները կարող են հանգեցնել այդ խնդրի լուծմանը։ Դա կողմերից քաջություն է պահանջում։ Ես նաև ուրախությամբ ընդունեցի այն, որ հակամարտող կողմերը համաձայնել են իրենց երկրների հասարակական կարծիքը փոխզիջումներին ավելի լավ պատրաստելու անհրաժեշտությանը։
Դրա համար հարկավոր է նպաստել ուժեղ և բազմակարծ քաղաքացիական հասարակության ձևավորմանը, ուր յուրաքանչյուր ոք կարող է ունենալ իր տեղն ու դերը։ Եթե հակամարտող կողմերից մեկը հավակնի բոլոր հարցերում իր պահանջների բավարարմանը, ապա նա ստիպված կլինի ընտրություն կատարել սեփական հասարակական կարծիքը հիասթափեցնելու կամ խաղաղության գործընթացը սպառնալիքի տակ դնելու միջև։
Ֆրանսիան, որպես ԵԱՀԿ Մինսկի խմբի համանախագահող երկիր, խորապես ներգրավված է այս գործընթացում։ Նա շարունակում է ջանքեր գործադրել մինչև տարեվերջ դա իր ավարտին հասցնելու ուղղությամբ։ Մեկ շաբաթ առաջ մեր արտգործնախարար Ալեն Ժյուպեն Ադրբեջանի արտգործնախարար Էլմար Մամեդյարովի հետ հանդիպման ժամանակ հայտնեց, որ մենք պատրաստ ենք շարունակել մեր ջանքերը ղարաբաղյան հակամարտության կարգավորման համար»։
