ԱԺ պատգամավոր Արման Բաբաջանյանը ֆեյսբուքյան իր էջում գրել է․
Այսօր Հատուկ քննչական ծառայությունից Խոշտանգումների և մարդու դեմ ուղղված հանցագործությունների քննության վարչության պետի տեղակալ Վ. Ավետիսյանի ստորագրությամբ ստացել եմ պաշտոնական նամակ, որով տեղեկացվում է, որ իմ կողմից ՀՀ գլխավոր դատախազին հոկտեմբերի 4-ին ներկայացված հաղորդման հիման վրա ՀՀ հատուկ քննչական ծառայությունում նախապատրաստված նյութերով որոշում է կայացվել ՀՀ քրեական օրենսգրքի 300-րդ հոդվածի 1-ին մասով քրեական գործ հարուցելու մասին (Իշխանությունը զավթելը` բռնություն գործադրելու կամ բռնություն գործադրելու սպառնալիքի միջոցով, ինչպես նաև Սահմանադրությամբ չնախատեսված այլ եղանակով Հանրապետության նախագահի, Ազգային ժողովի, կառավարության կամ Սահմանադրական դատարանի լիազորություններին տիրանալը պատժվում են ազատազրկմամբ` տասից տասնհինգ տարի ժամկետով)։
Կատարվում է նախաքննություն:
Հիշեցնեմ, որ այդ հաղորդմամբ գլխավոր դատախազությունից պահանջում էի քրեաիրավական գնահատական տալ Սահմանադրական դատարանի նախագահ Հրայր Թովմասյանի՝ ՍԴ նախագահ դառնալու ճանապարհին թույլ տված ապօրինություններին, ՍԴ նախագահին ներկայացվող անհամատեղելիության պահանջի կոպտագույն խախտմանը: Գլխավոր դատախազությունն իմ ներկայացրած հաղորդումը ուղարկել էր ՀՔԾ, որն էլ քրեական գործ է հարուցել համապատասխան հոդվածով:
Քրեական գործ հարուցելու ՀՔԾ-ի որոշումը կարևոր հանգրվան է Հայաստանում սահմանադրական ճգնաժամի հաղթահարման, սահմանադրական արդարադատության վերականգնման և Սահմանադրական դատարանի լեգիտիմացման ճանապարհին:
Այս որոշումը հատկապես կարևոր է դառնում ՍԴ-ի կողմից Ազգային ժողովի հայտնի դիմումը մերժելու համատեքստում: Հրայր Թովմասյանը Սահմանադրական դատարանի նախագահ է դարձել օրենքի կոպտագույն խախտմամբ, և նա ոչ միայն պետք է հրաժարական ներկայացնի, այլ նաև պատասխանատվություն կրի իշխանության բռնազավթման համար:
Հիշեցնեմ նաև, որ նույն հիմքով ես Ազգային ժողովում շրջանառության մեջ եմ դրել համապատասխան օրինագիծ՝ ՍԴ նախագահին ներկայացվող անհամատեղելիության պահանջի խախտման հատկանիշներով ՍԴ նախագահ Հրայր Թովմասյանի լիազորությունները դադարեցնելու համար ՍԴ դիմելու մասին:
Ազգային ժողովի «Բարգավաճ Հայաստան» և «Լուսավոր Հայաստան» խմբակցությունները տարբեր խնդրահարույց հիմնավորումներով մերժել են իմ այս նախաձեռնությանն աջակցելու առաջարկս: Դեռևս չեմ ստացել այս նախաձեռնության առնչությամբ իշխող «Իմ քայլը» խմբակցության պատասխանը, որը հատկապես քրեական գործ հարուցելու ՀՔԾ այսօրվա որոշման համատեքստում կարող է ունենալ նաև վճռորոշ քաղաքական նշանակություն:
Սահմանադրական արդարադատությունը Հայաստանում վերականգնվելու է, այդ նպատակով օգտագործվելու են բոլոր միջոցներն ու գործիքները՝ քաղաքական, իրավական, քրեաիրավական: ՀՔԾ այսօրվա որոշումը կարևոր հանգրվան է այդ դժվարին, բայց այլընտրանք չունեցող ճանապարհին:
https://www.facebook.com/babajanyana/posts/2778877505476292?__xts__[0]=68.ARBj7jcKM8kyZqQGHOWsTho2jFkTIivy2l0HDLSIyayqlv_K-zgGLzkExwYrwjJKeuxLqn_b8DGM6XuvHsQV1vjFBxyDQpj6OgoWnM4d6u9Qegv7_tr4ORK9ki6lcg6ScxXTBPkJiC3m0_coZlu0jGVTE8c98PUXFPfLov7NBGHWyz1-qNMmGINrR5Y3TS8HzuAEZQyz-zsl_OEXeTmtzKSTQj3GOovzVuuV_pz9sNm9cnyGGnZSwtW7sNf4QkkxcBXuEaqH9BZrXQcsuBeYeuirnIXMH9QsSuG58EbSlNKMHpqPH0X89lY5FWCK7nnT2dNckWE4Y-H9xanZQ-IOR5qsKDNy&__tn__=-R