Այսօր հետաձգվել է ՀՀ երկրորդ նախագահ Ռոբերտ Քոչարյանի և մյուսների գործով դատական նիստը, ինչը պայմանավորված էր Ռ. Քոչարյանի վատառողջ լինելով: Ռ. Քոչարյանի պաշտպանական թիմն արդեն տևական ժամանակ է ամեն ինչ անում է, որպեսզի Մարտի 1-ի գործով բուն դատավարությունը չսկսվի: Թեմայի շուրջ «Առաջին լրատվական»-ի հետ զրույցում փաստաբան Տիգրան Եգորյանը նշեց, որ այս դատավարության մեկնարկի հետաձգման հիմնական նպատակն ու հույսը եղել է այն, որ հնարավոր կլինի ապահովել այդ դատավարությանը՝ Քոչարյանի մասնակցության բացառումը. «Եվ որպես դրա արագ և արդյունավետ լուծում ՍԴ-ի միջոցով ձեռնարկվել են համապատասխան քայլեր… ՍԴ-ի անունից գործող այն անձինք, որոնք, ըստ էության, յուրացրել են ՍԴ դատավորի լիազորությունները, չեն խորշում և խտրություն չեն դնում միջոցների առջև, որպեսզի հասնեն իրենց կոնկրետ նպատակին»:
Մարդու իրավունքների եվրոպական դատարանը Երևան քաղաքի առաջին ատյանի ընդհանուր իրավասության դատարանի և Ռոբերտ Քոչարյանի դիմումների հիման վրա ՍԴ-ի ներկայացրած դիմումը վարույթ է ընդունել: Տիգրան Եգորյանի կարծիքով՝ այս դիմումի վարույթ ընդունելը և այս դիմումի վերաբերյալ տարբեր կարծիքներ հայցող ակտը քողարկված նպատակ ունի: Փաստաբանի խոսքով՝ Քոչարյանը և իր պաշտպանները հույս ունեն ՄԻԵԴ-ի կարծիքի շնորհիվ փակել այս էջը, սակայն ՄԻԵԴ-ը այս գործի վերաբերյալ կարծիք չի կարող հայտնել:
Տ. Եգորյանը նաև ընդգծեց, որ Ռ. Քոչարյանի ազգականը, խոսելով նրա առողջական խնդրից, ներկայացրել է, որ լուրջ բան չկա, մինչդեռ «Իզմիրլյան» բժշկական կենտրոնի բժիշկ Արմեն Չարչյանը լուրջ մտահոգություններ է հայտնել և համարել է, որ անհնարին է դատաքննությանը Քոչարյանի մասնակցությունը: Իրավապաշտպանը հիշեցրեց, որ Ա. Չարչյանն այն յոթ փորձագետներից մեկն էր, որն Արթուր Սարգսյանի՝ Հաց բերողի օբյեկտիվ զննությունը համարելով անհրաժեշտ, ի վերջո առանց զննության եզրակացություն էին տվել, որ նրան կարելի է կալանավորել:
Տիգրան Եգորյանն անդրադառնալով դիտարկմանը, որ Սահմանադրական դատարանը որոշում է կայացրել Ազգային ժողովի դիմումի հիման վրա ՍԴ դատավոր Հրայր Թովմասյանի լիազորությունները դադարեցնելու վերաբերյալ գործի քննությունը մերժելու մասին, նշեց. «Սա օդ կրակելու պես մի բան էր: Այս ԱԺ-ն անառարկելի լեգիտիմություն և վստահություն ունեցող ԱԺ է և չի կարող վատնել իր հեղինակությունը այսպիսի տեղապտույտների վրա… Մենք ունենք ՍԴ հետ կապված խոր ճգնաժամ և այն օրըստօրե խորանալու է, այն ունակ է հասնելու այն աստիճանի, որ սպառնա ազգային անվտանգությանը, և այս հարցը կարող է լուծել միայն Ազգային ժողովը: Այս հարցի վերաբերյալ ԱԺ-ն պարտավոր է և՛ իրավական, և՛ քաղաքական գնահատական տալ»:
Անդրադառնալով դիտարկմանը, որ ԱԺ պատգամավոր Արման Բաբաջանյանը օրինագիծ է ներկայացրել ԱԺ, ինչպես նաև դիմում է ներկայացրել ՀՀ գլխավոր դատախազություն՝ պահանջելով քրեաիրավական գնահատական տալ ՍԴ գործող նախագահ Հրայր Թովմասյանի կողմից 2018 թվականին այդ պաշտոնին հասնելու ճանապարհին թույլ տրված կոպտագույն օրինախախտումներին, Տիգրան Եգորյանն ընդգծեց. «Արման Բաբաջանյանը ԱԺ-ին փորձել է ցույց տալ, թե Հրայր Թովմասյանի դեպքում ինչ էր պետք անել, որը թողած՝ ծաղկեփունջ էինք հավաքում դաշտից՝ անհասկանալի պատրանքներ ու իղձեր փայփայելով»:
Մանրամասն՝ տեսանյութում: