Քաղաքապետ Տարոն Մարգարյանը հյուրընկալել է «Երևանի Ալբերտ Ազարյանի անվան մարմնամարզության օլիմպիական հերթափոխի մանկապատանեկան մարզադպրոցի» տնօրեն, օլիմպիական չեմպիոն և Երևանի պատվավոր քաղաքացի Ալբերտ Ազարյանի գլխավորությամբ քաղաքապետարան այցելած մարզիկներին ու նրանց մարզիչներին: Ողջունելով հյուրերին քաղաքապետ Տարոն Մարգարյանը նախ շնորհավորել է նրանց այս տարվա մարտի 26-28-ը Քաթարի մայրաքաղաք Դոհայում կայացած սպորտային մարմնամարզության աշխարհի գավաթի հերթական առաջնությունում գրանցած փայլուն հաղթանակների առթիվ և շնորհակալություն է հայտնել Հայաստանի պատիվը բարձր պահելու համար. «Մեզանից յուրաքանչյուրին անսահման ուրախություն ու ոգևորություն է հաղորդում միջազգային ասպարեզներում մեր մարզիկների յուրաքանչյուր նվաճում ու հաղթանակ: Երևանի քաղաքապետարանի տեղեկատվության և հասարակայնության հետ կապերի վարչությունից «Առաջին լրատվական»-ին հայտնում են, որ առավել ևս, երբ տվյալ մարզաձևում մենք արդեն իսկ ունեցել ենք լեգենդար մարզիկներ, ովքեր մեկընդմիշտ ամրագրել են Հայաստանի համբավն այդ մարզաձևում, մեր սպասելիքներն ու ակնկալիքները միշտ էլ կրկնապատիկ են: Եվ այս տեսանկյունից մարմնամարզությունը իրոք բացառություն չէ, հատկապես հաշվի առնելով, որ մանկապատանեկան մեր մարզադպրոցը ղեկավարում է հենց այդ լեգենդներից մեկը՝ Դուք, պարոն Ազարյան: Եվ շնորհավորելով բոլորիս աշխարհի առաջնությունում գրանցած փայլուն հաղթանակների կապակցությամբ, մաղթում եմ, որ Ձե՛ր գլխավորությամբ մեր թիմի մարզիկները մշտապես հաղթող ճանաչվեն ու դառնան Ձեր արժանի հետևորդը՝ նվաճելով նաև օլիմպիական չեմպիոնի պատվաբեր կոչումը», – ընդգծել է Տարոն Մարգարյանը:
Շնորհակալություն հայտնելով ջերմ ընդունելության և բարեմաղթանքների համար Ալբերտ Ազարյանն իր հերթին նկատել է, որ այդ հաղթանակների կերտման հարցում շատ որոշակի է նաև Երևանի քաղաքապետարանի և անձամբ քաղաքապետ Տարոն Մարգարյանի ներդրումը, քանզի համայնքային ենթակայության մարզադպրոցի հանդեպ մշտապես առկա է ուշադրությունն ու հատուկ վերաբերմունքը. «Քաթարում գրանցած մեր հաղթանակներն իրոք որ փայլուն էին, քանի որ կանոնակարգով նախատեսված 6 մրցաձևերից մեզ հաջողվեց հաղթել 3-ում: Ընդ որում, մասնակիցների թվում և՛ օլիմպիական չեմպիոն կար, և՛ աշխարհի ու Եվրոպայի գործող չեմպիոններ: 4-րդ մարզաձևում էլ նվաճեցինք արծաթե մեդալ, ինչը ևս հաջողություն է: Ինչևէ, ուզում եմ Ձեզ վստահեցնել, պարոն քաղաքապետ, որ մենք լի ենք վճռականությամբ և կշարունակենք անել հնարավորը, որպեսզի մշտապես բարձր պահենք թե՛ մեր երկրի և թե՛ մեր սիրելի Երևանի պատիվը», – նշել է Ալբերտ Ազարյանը:
Քաղաքապետ Տարոն Մարգարյանն էլ մեկ անգամ ևս վստահեցրել է, որ քաղաքապետարանը շարունակելու է իր լիազորությունների շրջանակում ըստ ամենայնի աջակցել մարզադպրոցին՝ նորանոր հաջողություններ ապահովելու հաստատակամությամբ:
