Ազատության հրապարակում «Դեմ եմ» նախաձեռնության կազմակերպած հանրահավաք-երթին ներկա էր նաև «Ազգային համաձայնություն» կուսակցության առաջնորդ Արամ Հարությունյանը: «Առաջին լրատվական»-ի հարցին՝ ի՞նչն է Ձեզ բերել Ազատության հրապարակ, Արամ Հարությունյանը պատասխանեց.
– Առաջին հերթին մենք էլ ենք դեմ պարտադիր կուտակայինին և եկել ենք աջակցություն հայտնելու:
– Ոչ իշխանական քաղաքական ուժերը, ովքեր այստեղ են և աջակցում են շարժմանը, որքանո՞վ են խանգարում կամ ընդհակառակը՝ օգնում նախաձեռնությանը:
– Չեմ գտնում, որ խանգարում են: Ավելին՝ նույն հասարակական, քաղաքացիական սեկտորը պետք է կամաց-կամաց քաղաքական պահանջներ ձևակերպի, որովհետև Հայաստանում որևէ խնդիր արդեն լուծելի չէ քաղաքացիական դաշտում: Ի վերջո՝ լուծումը լինելու է քաղաքական, հասարակական ուժերի համախմբմամբ և խնդիրների՝ քաղաքական ձևակերպման միջոցով: Գալու ենք դրան, բայց լավ կլինի՝ որքան հնարավոր է արագ գան և, ինչպես ասում են, անցավ:
– Ոչ իշխանական ուժերը կարծես համախմբվում են: Գագիկ Ծառուկյանը Ձեզ չի՞ հրավիրել իր հետ համախմբվելու:
– Բացի Սերժ և Տիգրան Սարգսյաններից՝ այսօր ցանկացած քաղաքական ուժի կամ գործչի հետ պատրաստ եմ համագործակցել: Մենք ԲՀԿ որոշ անդամների հետ որոշ հանդիպումներ ունեցել ենք, բայց ղեկավար մարմինների ֆորմատով հանդիպումներ դեռևս չեն եղել, բայց պատրաստ ենք:
– Իսկ որքանո՞վ են ազնիվ նրա մղումները, մեկը ով օլիգարխ է, ունի մենաշնորհ, արդյոք կամքի ուժ կունենա՞ կորցնելու այդ ամենը:
– Ես համոզված եմ, որ եթե Սերժ և Տիգրան Սարգսյանները շարունակեն մնալ, Հայաստանում բացի իրենցից՝ բոլորը կլինեն աղքատ: Հայաստանում երբեք այսպես չի եղել, որ բոլոր խավերը դժգոհ լինեն, իսկ այսօր Հայաստանում դժգոհ են և՛ սովորական քաղաքացին, և՛ միջին ձեռներեցը, և՛ նաև մեծահարուստը:
Մանրամասները՝ տեսանյութում:
