Ավստրալիայում 13-ամյա Քրիսթալ Լի Ուայթլին մահացել է սովորական մրսածությունից, հաղորդում է The Daily Mail-ը:
Պարբերականի տվյալներով, միջադեպից անմիջապես առաջ, աղջկա ամբողջ ընտանիքն արդեն վարակվել էր վիրուսով: Երբ ախտանշաններն ի հայտ են եկել Քրիսթալ Լիի մոտ, մայրը դրան ուշադրություն չի դարձրել: Սակայն, երկու օր անց, աղջկա ինքնազգացողությունը վատացել է և մայրը հաջորդ օրվա համար նրան գրանցել է բժշկի մոտ այցելության: Առավոտյան, սակայն, աղջիկն արդեն անգիտակից վիճակում էր. դեպքի վայր ժամանած բժիշկներն արձանագրել են նրա մահը:
Հարավային Ավստրալիայի առողջապահության նախարար Սթիվեն Ուեյդը հայտարարել է, որ իր գերատեսչությունը մրսածության կանխարգելման ծրագիր է սկսում:
«Վիրուսը փոխանցվում է մեկ անձից մյուսին և կարող է 48 ժամ ապրել ամուր, հարթ մակերեսների վրա, ինչպես, օրինակ, դռների բռնակների, խաղալիքների և սեղանների»,- բացատրել է Ուեյդը: Նա կոչ է արել բնակիչներին հոգ տանել իրենց և իրենց հարազատներին՝ հատկապես ձմռան ընթացքում:
