ԱԺ նիստն այսօր մեկնարկել է Սահմանադրական դատարանի նախագահի ընտրության հարցի քննարկմամբ: Հայաստանի Հանրապետության Սահմանադրության 166-րդ հոդվածի 1-ին մասի և 213-րդ հոդվածի համաձայն`հանրապետության նախագահը Սահմանադրական դատարանի դատավորի թափուր տեղի համար առաջադրել է Վահե Գրիգորյանի թեկնածությունը, որի շուրջ ծավալված խորհրդարանական բանավեճը, թերևս, վկայում է, որ ավելի շատ գործ ունենք ոչ թի իրավական, այլ քաղաքական անհամաձայնության հետ:
Թեմայի շուրջ «Առաջին լրատվական»-ի հետ քննարկմանը մասնակցեցին «Իմ քայլը» խմբակցության պատգամավոր Գայանե Աբրահամյանը, «Անտարես» հրատարակչության տնօրեն Արմեն Մարտիրոսյանը, քաղաքագետ Ստեփան Սաֆարյանը:
Ինչո՞ւ այսպիսի աժիոտաժ առաջացավ Վահե Գրիգորյանի թեկնածության շուրջ: Գ. Աբրահամյանի խոսքով՝ Վ. Գրիգորյանի թեկնածության շուրջ աժիոտաժը արդեն իսկ սկսվել էր անցյալ տարի, երբ չկայացած ընտրությամբ նախորդ խորհրդարանի կողմից մերժվեց նրա թեկնածությունը: «Վ. Գրիգորյանը եզակի իրավաբան է, փաստաբան, սահմանադրագետ… Իրավունքի և օրենքի գերկայությունն է, որ իրավական պետության զարգացման հենասյունն է, և Վ. Գրիգորյանը հենց դրա առաջամարտիկներից է, և երկար տարիներ պայքարել է դրա համար: Նա այն խորհրդանշական կերպարն է, որի շնորհիվ հեղափոխություն կիրականանա նաև ՍԴ-ում»,- նշեց պատգամավորը:
Ս. Սաֆարյանի դիտարկմամբ՝ խնդիրը ոչ թե քաղաքական կոնյուկտուրայի հետ է կապված, այլ անձի. «Աժիոտաժ չկար Վ. Գրիգորյանի դեմ, փոքր մի խմբակ անհամաչափ աղմուկ էր բարձրացրել, մինչդեռ քվեարկության արդյունքները և հասարակության արձագանքները փայլուն են, մարդիկ երանության մեջ են, որ վերջապես արժանավոր, սեփական ուժերով կայացած, քաղաքացիական և մասնագիտական դաշտում երբևէ չնահանջած մարդ է զբաղեցնում ՍԴ նախագահի պաշտոնը»:
Քաղաքագետի դիտարկմամբ՝ ՀՀ-ում շատ բան է փոխվել. այլ չափանիշներով են պաշտոնների նշանակվում: «Հպատակության, հարմարվողականության ժամանակաշրջանն ավարտվել է… Վ. Գրիգորյանի շուրջ աժիոտաժ բարձրացնողները հենց դրանից են անհանգստանում: Ռ. Քոչարյանի մոլեռանդ աջակիցները վախեցած են: Մարտի 1-ի գործը ՍԴ ուղարկելով՝ ցանկանում էին իսպառ արգելափակել քննությունը, բայց այլևս հնարավոր չէ անել այն, ինչը պլանավորվել էր»,- նշեց քաղաքագետը:
Ա. Մարտիրոսյանի խոսքով՝ Վահե Գրիգորյանը նախևառաջ Հայաստանի Հանրապեության ընկերն է: «Նա նաև իմ ընկերն է… Եթե խոսքն օրենքի մասին է, նա միայն դրանով է առաջնորդվում, ոչ թե հարազատի կամ ընկերոջ խնդրանքով: Երբ որ աղի բյուրեղը ընկնում է ինչ-որ տեղ, կողքի բակտերիաները սկսում են վատ զգալ, Վահեն «աղի բյուրեղ» է»,- ընդգծեց Ա. Մարտիրոսյանը:
Մանրամասն՝ տեսանյութում:
