«Պետք է ֆիքսենք մի բան, որ «Քաղպայմանագիրը», իշխող կուսակցություն հանդիսանալով հանդերձ, խնդիր չի դրել բացարձակապես բոլոր համայնքներում հաղթանակ տանելու։ Դա մերը չի, դա մեր գործելաոճն ու մշակույթը չի։ Այս ընտրությամբ ապացուցվեց, որ մենք մեր գաղափարներին ու մեր սկզբունքներին ենք հավատարիմ»,- «Առաջին լրատվական»-ի հետ զրույցում ասաց Կոտայքի մարզպետ Ռոմանոս Պետրոսյանը՝ հավելելով, որ եթե 350-ից ավելի աբովյանցի ցանկացել է իր քվեն տալ գործող քաղաքապետին, իրենք երբեք իրենց թույլ չեն տա բռնանալ այդ քվեին, ուղղորդել նրանք կամ օգտագործել ադմինիստրատիվ ռեսուրսը. «Մենք որևէ մեկին որևէ բան չենք ապացուցելու: Մենք խնդիր չենք դրել միշտ հաղթելու։ Մենք խնդիր ունենք միշտ ուժեղ լինելու»։
Վերլուծելով իրենց պարտության նախնական պատճառները՝ Պետրոսյանը նշեց, որ իրենք գործ ունեն դեռևս նախկին քաղաքական մշակույթը կրող ուժի հետ, որը սերտաճած է բիզնեսի հետ ու ունի լայն հզորություններ մասնավորապես Աբովյանում և այդ տնտեսական հզորությունները ներդրել էր Աբովյանը չզիջելու համար։ «Մենք ընդունում ենք քաղաքացու քվեի զորությունը։ Ընդունում ենք մեր պարտությունը, բայց սա նոր մարտահրավերների է մղելու մեզ Աբովյան քաղաքում»,- ասաց Պետրոսյանը՝ հավելելով, որ իրենց հիմնական թերացումը կազմակերպական էր. մարդիկ չէին նշանակել, որ այդ տարածքներում աշխատեին։
Ռոմանոս Պետրոսյանն անդրադարձավ նաև ԲՀԿ-ական պատգամավոր Էդուարդ Բաբայանի հայտարարությանը, թե թույլ չեն տալու, որ Աբովյանը դառնա գործ տվողների քաղաք։ Ասաց, որ պատրաստվում է դիմել Ազգային ժողով, որպեսզի քննարկվի պատգամավորի հայտարարությունը և պարզվի, թե նախ՝ ինչ է դա նշանակում, ում նկատի ուներ։
Առավել մանրամասն՝ տեսանյութում:
