Փերինչեքի գործով ՄԻԵԴ որոշման բողոքարկման վերջնաժամկետը մարտի 17-ն է: «Առաջին լրատվական»-ի հետ զրույցում Շվեյցարիա-Հայաստան խորհրդարանական բարեկամական խմբի քարտուղար Սարգիս Շահինյանը նշեց, որ կան երկու շվեյցարական կառավարական միավորներ, որոնք իրավասու են այդ ուղղությամբ արտահայտվելու. մեկը` Արդարադատության նախարարությունն է, մյուսը` ԱԳ նախարարությունը:
«Արտգործնախարարությունն, ինչպես հայտնի է, դեմ է բողոքարկմանը, ուստի միայն Արդարադատության նախարարությունը պիտի քայլեր ձեռնարկի, վերջինս էլ դեռ որոշում չի կայացրել: Շվեյցարիա-Հայաստան ընկերակցությունը լարված աշխատանք է տանում, մենք սպասում ենք, որ որոշումն ամենայն հավանականությամբ կկայացվի այս ուրբաթ»,- ասաց նա:
Շահինյանի խոսքով`այս հարցում մեծ դեր ունի նաև այն, որ Թուրքիայի Մարդու իրավունքների կազմակերպությունը գրավոր դիմում է ուղարկել Շվեյցարիայի արդարադատության նախարարությանը` Փերինչեքի գործով որոշումը վերանայելու պահանջով: Չնայած այս քայլի կարևորությանը` այդուհանդերձ, Շվեյցարիայի համար դա էական դեր չի կարող խաղալ, քանի որ Շվեյցարիայի և Թուրքիայի միջև հարաբերություններում քաղաքական գործոնի դերն ավելի մեծ է, այն գերակա է ցանկացած այլ դիրքորոշումներից:
Մեր հարցին` արդյոք արդեն կարելի՞ է խոսել տրամադրվածության մասին, Շահինյանը պատասխանեց, որ դեռ կարող է միայն ասել, որ իրավաբանական միավորները Արդարադատության նախարարությունից շատ ավելի սկեպտիկ են: «Բոլորս էլ քաջ հասկանում ենք` ոչ այդքան իրավաբանական պատճառաբանություններն են գերակշռում, որքան քաղաքական խնդիրները: Առաջիկա օրերին շատ կարևոր կոնտակտներ պիտի լինեն բարձրագույն մակարդակով, սակայն չպետք է մոռանալ` ԵԱՀԿ-ում Շվեյցարիայի նախագահությունը և ակնկալությունները` տեղ գտնելու Թուրքիայի նախագահությամբ գալիք տարի տեղի ունենալիք գագաթնաժողովին, բացարձակապես գերակշռում են որևէ այլ իրավաբանական կամ քաղաքական դիրքորոշումներից, որոնք երրորդ անձեր կամ կազմակերպություններ կարող են հայտնել»,- ասաց նա:
Շվեյցարիա-Հայաստան բարեկամական խորհրդարանական խումբը հաղորդագրություն է տարածել, որում նշում է. «ՄԻԵԴ որոշումը չբողոքարկելը կնշանակի հեռավորություն պահել Մարդու իրավունքների հիմնարար սկզբունքներից, դա նաև կհակասի ռասայական խտրականության ցանկացած տեսակի դեմ պայքարի շվեյցարական սկզբունքներին, գիտակցաբար ընդունում է մեկի կողմն այս քաղաքական պայքարի մեջ և խախտում չեզոքությունը: Փերինչեքի գործով ՄԻԵԴ որոշումը լուրջ բացթողումներ ունի, Շվեյցարիան դեռ կարող է բողոքարկել ՄԻԵԴ որոշումը, որն անընդունելի է ոչ միայն շվեյցարահայության համար, այլև նույն շվեյցարական արդարադատության համար` հաշվի առնելով, որ Շվեյցարիան երկու անգամ Ցեղասպանության ժխտումը դատապարտել է, վերլուծություններ են կատարվել իրավական հարցերով փորձագետների հետ, Շվեյցարիա-Հայաստան բարեկամական խումբը մշակել է փաստաթուղթ, որ ուղարկել է Դաշնային դեպարտամենտի տնօրենին և ՄԻԵԴ-ում Շվեյցարիայի ներկայացուցչին` կոչ անելով բողոքարկել այն:
Շվեյցարիան, որ հանդես է գալիս իբրև միջնորդ հակամարտության կողմերի` Հայաստանի և Թուրքիայի, ինչպես նաև Հայաստանի ու Ադրբեջանի միջև, ԵԱՀԿ-ում իր նախագահության տարում կարող է կորցնել վստահությունը: Շվեյցարիան չի կարող անտեսել, արհամարհել շվեյցարական և միջազգային ոչ կառավարական բազմաթիվ կազմակերպությունների հայտարարությունները, որոնք պահանջում են վերանայել որոշումը, Մարդու իրավունքներից Շվեյցարիայի հրաժարումն արդարացիորեն կառաջացնի միջազգային հանրության ցասումը, իսկ հետևանքներն անկանխատեսելի կլինեն:
Հարկ է նշել, որ շվեյցարական չեզոքությունը իր պատճառներն ունի. Թուրքիայի ԱԳ նախարար Ահմեդ Դավութօղլուն 2013-ի հոկտեմբերի 10-ին հայտարարեց Շվեյցարիայի հետ ռազմավարական գործընկերության մասին: Շվեյցարիան նաև չի թաքցրել, որ ցանկանում է 2015-ին կայանալիք G20 գագաթնաժողովին մասնակցել, որտեղ նախագահողը Թուրքիան է լինելու: Բացի այդ, Շվեյցարիան չի պաշտպանում իր քաղաքացիների իրավունքները: Վստահ ենք` Շվեյցարիայի համադաշնության նախագահ Դիդիե Բուրկհալտերը հունվարի 28-ին պատահաբար չէ, որ դատապարտեց մարդկության դեմ կատարված բոլոր հանցագործությունները: Փերինչեքի գործով ՄԻԵԴ որոշման դեմ իրենց բողոքի ձայնը կարող են բարձրացնել բոլոր սրտացավ քաղաքացիները` միանալով ստորագրահավաքին»:
