Anadolu գործակալությունը լազերային զենքի լուսանկարներ է հրապարակել, որոնք ստեղծվել են Թուրքիայի գիտատեխնիկական հետազոտությունների խորհրդի ճարտարագետների կողմից: TÜMOL կոչվող սարքը ներկայացնող տեսահոլովակը հրապարակել է Haber7-ը:
Նշվում է, որ նորագույն սարքը շատ առումներով նման է «Աստղային պատերազմներ» ֆանտաստիկ սագայի հերոսների կողմից օգտագործված զենքին:
Արտադրանքի ստեղծման համար, ինչպես նշում է Anadolu-ն, երեք ամիս է պահանջվել:
TRT հեռուստառադիոընկերությունը գրում է, որ լազերային համակարգը ներկայացվել է Ստամբուլի պաշտպանության արդյունաբերության միջազգային ցուցահանդեսում: Սարքը կարող է տեղադրվել MPT-76 մոդուլային հարվածային հրացանի վրա, որն օգտագործվում է թուրքական բանակում:
Թուրքիայի արդյունաբերության և տեխնոլոգիաների նախարար Մուստաֆա Վարանկայի խոսքերով, նոր սարքը լազերային ճառագայթով կարող է հակառակորդին վնաս հասցնել 250 մետր հեռավորության վրա, իսկ դրա հզորությունը բավարար է նավի պողպատե իրանը հալեցնելու համար: