Բելառուսը հույս ունի մինչև այս տարվա վերջը Ռուսաստանի նավթի այլընտրական ներմուծում սկսել Բալթյան երկրների և Ուկրաինայի նավահանգիստների միջոցով: Այդ մասին ապրիլի 23-ին լրագրողներին տեղեկացրել է Բելառուսի նավթընկերության (ԲՆԸ) գլխավոր տնօրենի տեղակալ Սերգեյ Գրիբը՝ գրում է tass.ru-ն: «Մենք հույս ունենք այս տարի մատակարարումներ սկսել»,- նշել է ԲՆԸ-ի ներկայացուցիչը:
Գրիբը հայտարարել է, որ Բալթյան երկրների և Ուկրաինայի նավահանգիստները շահագրգռված են, որ Բելառուսը «նավթի լրացուցիչ հոսք ապահովի իրենց նավահանգիստների միջոցով, քանի որ նրանց համար դա լրացուցիչ վաստակ է»: Գրիբը նշել է, որ գործընկերներին ընտրելիս «ամեն ինչ կախված կլինի այն պայմաններից, որոնք սահմանակից երկրները կառաջարկեն փոխաբեռնման և փոխադրման վերաբերյալ»:
«Կամ դրանք բալթյան նավահանգիստներն են, կամ Օդեսան, կամ համակցումը: Մոզիրի նավթամշակման գործարանն ավելի մոտ է Ուկրաինային… Միանգամայն հնարավոր է, որ նավթն ուղարկվի Ուկրաինայի տարածքով: Նավթանը (Նավթան» ԲԲԸ-ն) ավելի մոտ է մերձբալթյան նավահանգիստներին, համապատասխանաբար տրամաբանական է դիտարկել Բալթիկ ծովի նավահանգիստները»,- հայտարարել է Բելառուսի նավթընկերության փոխտնօրենը: Գրիբը հավելել է, որ Բելառուսում կարող է վերամշակվել Ադրբեջանից, Սաուդյան Արաբիայից, Նիգերիայից և այլ երկրներից մատակարարված նավթը: Ընդսմին նա չի ճշտել, թե այսօր բելառուսական կողմը նավթի ներմուծման ինչ կոնկրետ ուղղություններ է դիտարկում:
