Սիրիայի առողջապահության նախարարությունը հայտնել է խոզի գրիպի (H1N1) A շտամի հետևանքով մահվան 19 դեպքի մասին: Ընդհանուր առմամբ վտանգավոր վիրուսային ինֆեկցիան հայտնաբերվել է 59 մարդու մոտ: Նրանց մեծ մասը տառապում են քրոնիկ հիվանդություններով: Այս մասին հայտնում է ITAR-TASS-ը:
Դամասկոսում մամլո ասուլիսի ժամանակ ելույթ ունենալով՝ առողջապահության նախարար Սաադ Ալ-Նայեֆը նշել է, որ խոզի գրիպի համաճարակի բռնկումը գրանցվել է գլխավորապես Համա կենտրոնական նահանգում, որը գտնվում է Դամասկոսից 220 կմ հյուսիս: «Մենք պրոֆիլակտիկ միջոցառումներ ենք ձեռնարկում, որպեսզի այն չտարածվի բոլոր նահանգներում: Մեզ հաջողվել է ապահովել այդ ինֆեկցիայի դեմ պայքարի համար դեղանյութերի ստացում»,- ընդգծել է նա:
«A (H1N1) գրիպի ախտանշաններով վարակվածների աճող թվի մասին ազդանշաններ ստացվել են մի քանի երկրներից: Սակայն Սիրիան գտնվում է հատուկ պայմաններում, այստեղ շարունակվում է հակամարտությունը, և շատ ընտանիքներ լքել են իրենց տունը՝ դառնալով փախստականներ, նրանք ի վիճակի չեն պահպանել անհրաժեշտ հիգիենան»,- նշել է Առողջապահության համաշխարհային կազմակերպության ներկայացուցիչ Էլիզաբեթ Հոֆը: Նրա խոսքով՝ ՄԱԿ-ի միջոցով սիրիական իշխանություններին ցուցաբերվում է արտակարգ աջակցություն և պատվաստումների համար պատվաստանյութեր են տրամադրվում, որոնք բաշխվում են բոլոր տարածաշրջաններում:
Համաճարակաբան Կունազ Ալ-Շեյխը հայտնել է, որ տուժածների թվի 60 տոկոսը 15-50 տարեկան կանայք են: Նրանց առողջությունն ու իմունային համակարգը թուլացած են:
