Եվրոպայի առաջնության ընտրական փուլի առաջին երկու խաղերում Հայաստանի ազգային հավաքականը պարտություն կրեց՝ հայտնվելով բարդ իրավիճակում: Մեր ընտրանին J ենթախմբում նախավերջին 5-րդ հորիզոնականում է: Առաջին տեղում Իտալիայի հավաքականն է, որն ունի 6 միավոր: Երկրորդ և երրորդ տեղերում համապատասխանաբար Հունաստանի և Բոսնիա-Հերցեգովինայի հավաքականներն են, որոնք ունեն 4-ական միավոր: 4-րդ տեղում էլ Ֆինլանդիան է, որը Հայաստանի հավաքականի հաղթելու շնորհիվ ունի 3 միավոր: Ընտրական մրցաշարին մասնակցող 55 հավաքականներից 10-ին է առաջին երկու հանդիպումներում վաստակել 0 միավոր: Մասնավորապես բացի մեր ազգային թիմից անհաջողության են մատնվել նաև Բելառուսը, Վրաստանը, Ֆարերյան Կղզիները, Ավստրիան, Լատվիան, Անդորրան, Մոլդովան, Սան Մարինոն և Լիխտենշտեյնը:
Անհաջողակների շարքում անսպասելի էր թերևս Ավստրիայի ընտրանուն տեսնելը, որն ունի բավական ուժեղ կազմ և պայքարում է եզրափակիչ փուլի ուղեգրի համար: Առաջին տուրում ավստրիացիները սեփական հարկի տակ 0:1 հաշվով զիջել էին Լեհաստանին, իսկ երկրորդ տուրում հյուրընկալվելիս 4:2 հաշվով Իսրայելին: Սպասելիքներն ավելի մեծ էին նաև Բելառուսից և Վրաստանից որոնք դուրս են եկել Ազգերի լիգայի խաղարկության փլեյ-օֆֆ: Մեր երկրպագուները սովորաբար ազգային թիմի ելույթները համեմատում են Վրաստանի և Ադրբեջանի ելույթների հետ: 2020 թվականի Եվրոպայի առաջնությունը տարածարշջանի հավաքականների համար կարելի է բացառիկ համարել: Մասնավորապես, Հայաստանին, Ադրբեջանին և Վրաստանին չի հաջողվել գոնե մեկ միավոր վաստակել: Նշենք սակայն, որ ի տարբերություն Հայաստանի և Վրաստանի, Ադրբեջանի հավաքականը մեկ հանդիպում է անցկացրել հյուրընկալվելիս 2:1 հաշվով զիջելով աշխարհի փոխչեմպիոն Խորվաթիային: Վրաստանի ազգային թիմը սեփական հարկի տակ Շվեյցարիայի 0:2 հաշվով զիջելուց հետո մրցակցի հարկ տակ 1:0 հաշվով պարտվել էր Իռլանդիային:
Հիշեցնեք, որ Հայաստանի հավաքականը մեկնարկային խաղում Սարաևեոյում 2:1 հաշվով պարտվել էր Բոսնիա-Հերցեգովինային, այնուհետև Երևանում՝ 0:2 հաշվով Ֆինլանդիային: Ընդհանուր առմամբ տարածաշրջանի հավաքականները 5 հանդիպումներում կրելով նույնքան պարտություն խփել են ընդամենը 2 գնդակ: Հայաստանի ազգային հավաքականի կազմում աչքի էր ընկել Մխիթարյանը, որը գրավել էր Բոսնիայի դարպասը, իսկ Ադրբեջանի հավաքականի կազմում՝ Ռամիլ Շեյդաևը: Առավել տխուր է Վրաստանի հավաքականի վիճակագրությունը, որը երկու հանդիպումերում ոչ մի գոլ չի խփել: Ազգերի լիգայի խաղարկությունից հետո Վրաստանի հավաքականում ինչ-որ բան այն չէ: Վրացիների խաղում բացակայում է սրությունը: Հիշեցնենք, որ Վրաստանը դարձել էր Ազգերի լիգայի խաղարկության D դիվիզիոնի գլխավոր հայտնությունը: Աչքի ընկնեով փայլուն ելույթով վրացիները խմբային փուլի ավարտից դեռևս երկու տուր առաջ ապահովել էին մասնակցությունը փլեյ-օֆում: Հիմնվելով տեղի ունեցած հանդիպումների և արդյունքների վրա այն ժամանակ վստահ էինք որ հարևան երկրի հավաքականը Եվրոպայի առաջնության եզրափակչում հայտնվելու ամենաիրական հավակնորդն է: Սլովակ մասնագետ Վլադիմիր Վայսի գլխավորությամբ Վրաստանն իսկապես ցուցադրում էր գրագետ և դինամիկ ֆուտբոլ: Իրականում դժվար է ասել թե ինչով է պայմանավորված Վրաստանի հավաքականի անկումը: Ամեն դեպքում երկու հանդիպումները հիմք չեն հանդիսանում պնդելու, որ վրացիների մոտ ճգնաժամ է սկսվել:
Նշենք նաև, որ Վրաստանի ազգային թիմում շատ չեն բարձրակարգ ֆուտբոլիստները, բայց մարզչական խելամիտ լուծումները Ազգերի լիգայի խաղարկությունում տվեցին լուրջ արդյունք: Ինչ վերաբերում է Ադրբեջանին, ապա ոմանց կարծիքով մարզչական փոփոխությունից հետո այս հավաքականը առաջընթաց է գրանցել: Ազգերի լիգայի խաղարկությունում կրած անհաջողությունից հետո Ադրբեջանի ֆուտբոլի ֆեդերացիան պաշտոնանկ էր արել Գուրբան Գուրբանովին, նրա փոխարեն ազգային թիմը վստահելով խորվաթ մասնագետ Նիկոլա Յուրչևիչին: Խորվաթիայի դեմ խաղում իսկապես ադրբեջանցիները վատ տպավորություն չթողեցին, ինչը խոսում է այն մասին, որ բարձրակարգ մասնագետը անհրաժեշտություն է թույլ հավաքականների համար: Ինչևէ, հաջորդ հանդիպումը Հայաստանի ազգային հավաքականն անց է կացնելու հունիսի 8-ին Երևանում մրցելով Լիխտենշտեյնի հավաքականին հետ: Հունիսի 11-ին էլ մերոնք Աթենքում կխաղան Հունաստանի հետ:
Կարծում ենք մինչ այդ հանդիպումները ժամանակ ունենք հետևություններ անելու և սխալներն ուղղելու համար: Մենք շարունակում ենք մնալ եվրոպական ֆուտբոլի անդունդում, որից դուրս գալու ուղին ցավոք դեռ չի նշմարվում: Բացի գրանցված պարտություններից Հայաստանի հավաքականը շարունակում է ցուցադրել թույլ խաղ, որն ունի թե օբյեկտիվ և թե սուբյեկտիվ պատճառներ:
Լուսանկարը՝ ՀՖՖ-ի
