Հղիության ընթացքում յուրաքանչյուր ծխախոտը կրկնապատկում է երեխայի մահվան վտանգը. գիտնականներ

Հղիության ընթացքում ծխելը զգալիորեն մեծացնում է երեխայի հանկարծակի մահվան (ԵՀՄ) վտանգը: Դա հաստատել է այն հետազոտությունը, որն անցկացրել են ԱՄՆ մի շարք գիտական կենտրոնների, այդ թվում՝ Սիեթլի Մանկական հետազոտական ինստիտուտի (ՄՀԻ), ԱՄՆ թոքաբանների ասոցիացիայի, Մանկաբարձների և գինեկոլոգների ամերիկյան քոլեջի, ինչպես նաև Բերքլիի Կալիֆոռնիական համալսարանի բժշկական ֆակուլտետի մասնագետները: Նրանց աշխատանքների արդյունքները հրապարակված են Մանկաբույժների ամերիկյան ակադեմիայի պաշտոնական հանդեսում՝ տեղեկացնում է TASS-ը։

Գիտնականները եկել են այն եզրակացության, որ ԵՀՄ-ի դեպքերի 23-ից մինչև 34 տոկոսը տեղի է ունենում այն պատճառով, որ կանայք ծխում են հղիության շրջանում: Այդ կապակցությամբ ՄՀԻ-ի նյարդաբան Տատյանա Անդերսոնը ընդգծել է, որ ոչ մի ծխախոտ անհետևանք չի մնում, և «բժիշկները պարզապես պարտավոր են հիվանդներին տեղեկացնել հղիության ժամանակ ծխելը շարունակելու վտանգի մասին»:

Հետազոտության հեղինակները նաև ուշադրություն են դարձրել այն բանին, որ ապագա մոր ծխելը կարող է հանգեցնել մանկան քաշի նվազեցմանը 20 տոկոսով: Բացի այդ, այն զգալիորեն մեծացնում է երեխայի մոտ այնպիսի վտանգավոր հիվանդությունների առաջացման վտանգը, ինչպիսիք են՝ ասթման, աղեստամոքսային տրակտի դիսֆունկցիան, ճարպակալումը։