Ֆրանսիայում առնվազն երկու «Միշլեն» ռեստորանների շեֆ-խոհարարներ ասել են, որ պատրաստվում են արգելել իրենց այցելուներին լուսանկարել ուտեստը:
«Նախկինում նրանք գալիս և լուսանկարվում էին` ի հիշատակ իրենց և իրենց ընտանիքի, իրենց տատիկների: Այժմ նրանք ուտեստը լուսանկարում են և տեղադրում Facebook-ում կամ Twitter-ում, մեկնաբանություններ գրում: Այդ ընթացքում ուտելիքը հասցնում է սառչել»,- France TV-ին բողոքել է շեֆ-խոհարար Ալեքսանդր Գուաթյեն:
Գուաթյեն նշել է նաև, որ շատ ռեստորաններ անհանգստանում են այն պատճառով, որ լուսանկարելով՝ օգտատերերը խախտում են իրենց մտավոր սեփականության իրավունքը: Սակայն Գուաթյեի համար ամենից տհաճն այն փաստն է, որ սոցիալական կայքերում լուսանկարները մարդկանց շեղում են ուտելիքից:
Մեկ այլ շեֆ-խոհարար` Ժիլ Գուժոնը, հայտարարել է, որ մտադիր է արգելել ճաշատեսակների լուսանկարումը, սակայն դեռևս չգիտի` ինչպես այն ճիշտ ձևակերպել: Նրա խոսքերով` եթե ուտեստի նկարը տեղադրվում է համացանցում, դրա արտաքին տեսքը դադարում է ապագա հաճախորդների համար անակնկալ լինելուց:
