Ղարաբաղյան հարցը վերադարձել է ՄԱԿ-ի ԳԱ օրակարգ

Ռուսական Regnum գործակալությունը, վկայակոչելով ՄԱԿ-ի պաշտոնական կայքը, գրում է, որ ՄԱԿ-ի Գլխավոր ասամբլեան Ադրբեջանին առնչվող երկու հարց է ներառել 66-րդ նստաշրջանի օրակարգում։

Օրակարգային հարցերի թվում դրանք ստացել են 35-րդ և 36-րդ համարները և ունեն հետևյալ տեսքը. «ՎՈՒԱՄ-ի (Վրաստան, Ուկրաինա, Ադրբեջան, Մոլդովա) տարածքի ձգձգվող հակամարտությունները և դրանց ազդեցությունը միջազգային խաղաղության, անվտանգության ու զարգացման վրա» և «Ադրբեջանի «օկուպացված» տարածքների դրության մասին»։

Այս հարցերը վերստին ներկայացվել են կազմակերպության քննարկմանը, քանի որ դրանք 65-րդ նստաշրջանի ժամանակ չէին դրվել քվեարկության։

Տվյալ հարցերի վերաբերյալ փաստաթղթերը պատրաստվել են ՎՈՒԱՄ-ի կողմից և առաջին անգամ ներառվել ՄԱԿ-ի ԳԱ-ի 63-րդ նստաշրջանի օրակարգում։

Հիշեցնենք, որ ՄԱԿ ԳԱ-ի 66-րդ նստաշրջանը տեղի է ունենալու 2011 թվականի սեպտեմբերի 14-ին։