ՀՀ փոխվարչապետ, տարածքային կառավարման նախարար Արմեն Գևորգյանի մոտ այսօր կայացած խորհրդակցության ընթացքում քննարկվել են վերջերս Սյունիքի մարզ կատարած աշխատանքային այցի ժամանակ բարձրացված որոշ հարցեր, որոնք, մասնավորապես, վերաբերում էին Կապան քաղաքում «Աջակցություն երիտասարդ ընտանիքների բնակարանաշինարարությանը» բնակարանային ապահովության և «Սիսիանը` 2014թ. երիտասարդական մայրաքաղաք»՚ ծրագրերի իրականացմանը: Խորհրդակցությանը մասնակցում էին Սյունիքի մարզպետը, Կապանի և Սիսիանի քաղաքապետները, Սպորտի և երիտասարդության, Մշակույթի, Կրթության և գիտության, Սփյուռքի, Տարածքային կառավարման նախարարությունների պաշտոնյաներ:
Տարածքային կառավարման նախարարության հասարակայնության հետ կապերի բաժնից «Առաջին լրատվական»-ին հայտնում են, որ քննարկվել է տարվա ընթացքում Սիսիանում անցկացվելիք միջոցառումների ծրագրի նախագիծը: Փոխվարչապետը մասնակիցներին հանձնարարել է ծրագրի վերաբերյալ բոլոր առաջարկությունները ներկայացնել Սպորտի և երիտասարդության հարցերի նախարարություն, որն էլ կամփոփի դրանք և միջոցառումների վերջնական ծրագիրը կներկայացնի կառավարություն: Կարևորվել է բազմաբնույթ միջոցառումների իրականացումը, որոնց կմասնակցեն երիտասարդներ նաև Սփյուռքից:
Սպորտի և երիտասարդության հարցերի փոխնախարար Արսեն Քարամյանը տեղեկություններ է ներկայացրել Կապան քաղաքում «Աջակցություն երիտասարդ ընտանիքների բնակարանաշինարարությանը» ծրագրի վերաբերյալ: Փոխնախարարը նշել է, որ մարզային և տեղական իշխանությունների աջակցությամբ արդեն կատարվել է տարածքի ընտրությունը, և անհրաժեշտ է կառավարության աջակցությունը` համապատասխան ձևակերպումներն ստանալու համար: Փոխվարչապետն առաջարկել է գրավոր դիմել կառավարությանը` տարածքի հետ կապված խնդիրների լուծման և ծրագրին ընթացք տալու համար:
