Վրաստանի վարչապետ Իրակլի Ղարիբաշվիլին Բրյուսելում հանդիպել է ՆԱՏՕ-ի գլխավոր քարտուղար Անդերս Ֆոգ Ռասմուսենի հետ: Ինչպես հաղորդում է Interfax-ը, վկայակոչելով վարչապետի մամլո ծառայությանը, հանդիպմանը, որը կայացել է ՆԱՏՕ-ի շտաբ-գրասենյակում, կողմերն ընդգծել են երկկողմ համագործակցության և գործընկերային հարաբերությունների կարևորությունը:
Հաղորդվում է, որ քննարկվել է ՆԱՏՕ-ին ինտեգրման ճանապարհին Վրաստանի գրանցած առաջընթացը և այն բարեփոխումները, որոնք երկիրն անցկացրել է վերջին ժամանակաշրջանում:
Հանդիպումից հետո կայացած մամլո ասուլիսում Ռասմուսենը հայտարարել է, որ վերջին ժամանակներս Վրաստանի ձեռք բերած առաջընթացը կնշվի ՆԱՏՕ-ի առաջիկա գագաթնաժողովում:
«ՄԵնք որոշել ենք, որ կշարունակենք գնահատել այն երկրներին, որոնք ցանկանում են դառնալ Դաշինքի անդամ: Մենք զգալի առաջընթաց ենք տեսնում Վրաստանում և հուսով եմ, որ գագաթնաժողովում այդ առաջընթացը կնշվի»,- ասել է ՆԱՏՕ-ի գլխավոր քարտուղարը:
Ղարիբաշվիլին իր հերթին հայտարարել է, որ Վրաստանը շարունակում է շարժվել ՆԱՏՕ-ի ուղղությամբ: