Վրաստանի նախկին վարչապետ Բիձինա Իվանիշվիլին ներկայացրել է այսօր իր հիմնադրած «Մոկալակե» (Քաղաքացի) ոչ կառավարական կազմակերպությունը, որի նպատակը, վարչապետի խոսքով, երկրում քաղաքացիական հասարակության զարգացումն է:
Իվանիշվիլին մտադիր է անմիջականորեն ղեկավարել նոր կազմակերպությունը՝ հայտնում է Gazeta.ru-ն:
Վրաստանի նախկին վարչապետը քաղաքականությունից հեռանալու մասին հայտարարել էր նոյեմբերի 24-ին՝ իր հիմնած «Վրացական երազանք՝ ժողովրդավար Վրաստան» կուսակցության համագումարի ժամանակ:
«Ես հեռանում եմ քաղաքականությունից՝ թողնելով շատ արդյունավետ կառավարություն: Ես հեռանում եմ քաղաքականությունից, սակայն կմնամ ակտիվ քաղաքական գործիչ: Ես խոստանում եմ, որ առնավազն 20 տարի ես կծառայեմ ժողովրդին: Ձեզ հետ ես կհոգամ, որպեսզի իշխանությունը ծառայի ժողովրդին»,- ասել էր նա:
