Հունվարի 27-ին Աթենքի Զինված Ուժերի «Սպայի տան» հանդիսասրահում կազմակերպվել էր ՀՀ ԶՈՒ վերակազմավորման 22-րդ տարեդարձին նվիրված տոնական ընդունելություն, որին ներկա էին մոտ 300 հրավիրյալ, այդ թվում` Հունաստանում հավատարմագրված օտարերկրյա դիվանագետներ, Հունական խորհրդարանի պատգամավորներ, Ռազմարդյունաբերական համալիրի ընկերությունների ներկայացուցիչներ, հունահայ ազգային-քաղաքական և հասարակական-մշակութային կառույցների ներկայացուցիչներ, հայկական, հունական և օտար ԶԼՄ-ների խմբագիրներ ու թղթակիցներ:
Հունաստանի Հետևակի բարձրագույն դպրոցի հայ ունկնդիր սպաները, Ցամաքային զորքերի «Էվելպիդոն» ռազմական ակադեմիայի կուրսանտները և ՀՄԸՄ արի-արենույշների խմբերը ողջունեցին և զինվորական պատիվներով ընդունեցին հյուրերին, որոնց թվում նաև` Հունաստանի Ազգային Պաշտպանության Գլխավոր Շտաբի պետ, գեներալ Միխայիլ Կոստարակոսին, նրա տեղակալներին, Ռազմածովային ուժերի և Ռազմաօդային ուժերի գլխավոր շտաբերի պետերին:
Միջոցառումը սկսվել է ազգային հիմներով` ՀՀ ԶՈՒ կուրսանտների և սպաների կատարմամբ: Օրվա խորհրդի` ՀՀ ԶՈՒ կազմավորման, հայ-հունական պատմական դարավոր զինակցության և ներկա երկկողմ ռազմական համագործակցության վերաբերյալ ամփոփ ելույթով հանդես է եկել ՀՀ ռազմական կցորդ, գնդապետ Սամվել Ռամազյանը:
Ելույթով հանդես է եկել Ազգային Պաշտպանության ԳՇ պետը, ում ՀՀ դեսպանի կողմից, ՀՀ պաշտպանության նախարարի հրամանի համաձայն, հանձնվեց «Ռազմական համագործակցության համար» մեդալը: Իր ելույթում գեներալ Կոստարակոսը շեշտեց, որ հայ-հունական ռազմական համագործակցությունն անպայման զարգացման ուղիով է ընթանալու` ի շահ երկու եղբայր երկրների ու ժողովուրդների, ընդգծել է, որ պատիվ է Հունաստանում գերազանց պատրաստություն ունեցող հայ կուրսանտների ու սպաների առկայությունը:
Հաջորդաբար ՀՀ ՊՆ ընթերցված հրամանագրի համաձայն` հանդիսավոր պայմաններում կայացել է հայ-հունական ռազմական համագործակցության ոլորտում իրենց անձնական ավանդը ներդրած 5 բարձրաստիճան հույն սպաների, այդ թվում` Միջազգային հարաբերությունների, Ռազմական տեղեկատվության, Հատուկ նշանակության զորքերի և այլ ծառայությունների ղեկավարների պարգևատրումը ՀՀ ԶՈՒ գերատեսչական մեդալով:
Պատվո հուշատախտակներ են հանձնվել 1974թ. Կիպրոսում և 1993թ. ՀՀ սահմանների պաշտպանության ժամանակ զոհված հայորդիների հարազատներին:
Միաժամանակ Հունաստանի Ազգային Պաշտպանության նախարար Դիմիտրիս Ավրամոպուլոսի հրամանագրով «Արժանյաց և Պատվո խաչ» շքանշանով պարգևատրվել է ՀՀ ռազմական կցորդ, գնդապետ Սամվել Ռամազյանը` «հայ-հունական ռազմական համագործակցության զարգացման մեջ ներդրած անձնական ավանդի համար»: Շքանշանը հանձնել է գեներալ Կոստարակոսը:
Պարգևատրումներին հաջորդել է պաշտոնական հյուրասիրություն:
