Apple ընկերությունը ցանկանում է այնպես անել, որպեսզի օգտատերերը iTunes-ում իրենց օգտահաշվի օգնությամբ կարողանան ոչ միայն վճարել թվային ապրանքի, այլև խանութներում իրական ապրանքների ու ծառայությունների համար:
Ինչպես գրում է The Wall Street Journal-ը՝ հղում անելով իրազեկ աղբյուրներին, բջջային վճարումների ոլորտի ներկայացուցիչների հետ նման հնարավորությունը քննարկել է Էդդի Կյուն՝ Apple-ի ավագ փոխնախագահը, ով զբաղվում է iTunes-ի և App Store-ի հարցերով: Թերթը նշում է, որ ընկերությունը Ջենիֆեր Բեյլիին, ով երկար ժամանակ պատասխանատվություն է կրել Apple-ի առցանց խանութների համար, տեղափոխել են մեկ այլ պաշտոնի, որում նա պատասխանատվություն կկրի բջջային վճարումների համար:
Ընդլայնելով i-սարքերի վճարունակությունը՝ Apple-ը դուրս է գալիս բարձր հեռանկարային շուկա, որտեղ արդեն գործում են այնպիսի խոշոր խաղացողներ, ինչպիսիք են PayPal-ն ու Google Wallet-ը, ինչպես նաև սկսնակներ Square-ն ու Stripe-ը:
Forrester Research-ի գնահատականով՝ ԱՄՆ-ում սմարթֆոնների տերերը 2017-ին կկատարեն 90 միլիարդ դոլարի գնում՝ 2012-ի 12.8 մլրդ դոլարի դիմաց:
