«Փորձել ենք համադրել երկու սկզբունք՝ ներառականության սկզբունքը, այսինքն՝ մենք փորձել ենք ներգրավել տարբեր ոլորտների առավել շատ մասնագետների, և համաձայնության սկզբունքը, այսինքն՝ հնարավոր է, օրինակ, ստեղծել ցուցակ, որտեղ ֆանտաստիկ տաղանդավոր մարդիկ են, բայց ինքնին դա բավարար չէ, որպեսզի ցուցակը լավը լինի»,- «Առաջին լրատվական»-ի հետ զրույցում ասաց «Իմ քայլը» դաշինքի պատգամավորի թեկնածու, փոխարտգործնախարարի պաշտոնակատար Ռուբեն Ռուբինյանը՝ ներկայացնելով այն սկզբունքները, որոնցով առաջնորդվել է դաշինքը ընտրական ցուցակը կազմելիս:
Նրա խոսքով՝ քաղաքական ուժի կազմակերպած խմբակցության նպատակներից մեկը կանխատեսելի լինելն է և տարբեր հարցերի շուրջ հստակ մոտեցում ունենալը, ուստի պետք են միմյանց հետ համատեղելի մարդիկ:
Ռուբեն Ռուբինյանը չի կարծում, որ ՔՊ-ի և ՀՀՇ-ի համեմատությունը տեղին է. «ՀՀՇ-ն որպես կուսակցություն կազմավորվեց Հայոց համազգային շարժման հիմքի վրա, իսկ մինչև անկախությունը Հայաստանում ըստ էության չկար քաղաքական դաշտ: Ուստի բնական էր, որ հետագայում տարբեր մարդիկ կամ մարդկանց խմբեր կարող էին հակասություններ ունենալ միմյանց հետ: Այսօր մենք ունենք շատ թե քիչ ձևավորված կուսակցություններ, քաղաքական փորձ ունեցող մարդիկ՝ դրական կամ բացասական: Եվ անհամեմատելի է քաղաքական դաշտի կայացվածության մակարդակը»:
Մեր զրուցակիցը նշեց, որ իրենց համար ամենակարևորը հանրության համար կանխատեսելի լինելն է:
Մանրամասները՝ տեսանյութում:
